Slavoj Žižek

Slavoj Žižek « La violença es pas un accident daus nòstres sistemis, ‘la ne’n es la basa ».

Vòle pas ‘quí persentar lu filosòfe, v’autres atz màs de far ‘na p’ita charcha sus la tiala mai son nom. Eu es estat format a Ljubljana e ne’n França. Ne’n mai dau filosòfe, eu fai lu psicanaliste, de tradici’ lacaniana.

Žižek fai ‘na critica bona de la societat, occidentala, dau jorn d’aüei, mai que mai sus sa faiçon de refusar l’autoritat. Eu es contra los, o las, que fan la propaganda d’una societat que balha « la libertat per chausir » coma orlutz, societat montada contra la de « l’autoritat ».

‘Tenci’ es pas non pus un dictator, fau prener aquí l’autoritat formulada per la societat, per « lu grand tot », ‘laidonc per lu Žižek, refusar ‘na fòrma d’autoritat, dire non ad una autoritat es dubrir un espací per de las malaudias mentalas coma estre paranoïc o ‘ver de las possadas narcissicas.

Per eschivar ‘quò, Žižek, perpausa daus actes politiques coma far ‘na revoluci’, o b’etot de modifiar lu sistemí dins sa violença, lu capitalisme ; entau fasent, l’òrdre noveu dau punt de vuda daus simbous perpausariá un noveu espací ; es un pauc quò que ditz l’eroï dau libre que dau filme V per Vendetta.

Eu balha mai d’un eisemple per eimatgar sos perpaus, divers e variats, per eisemple queu d’aquí sus l’educaci’ :

Un goiat vòu pas ‘nar veire sa granda.

Dins la logica traditionala, los pairs disen : tu marches coma n’autres autrament vas ne’n trapar una jurta.

Dins la logica societalista actuala, la passat lu modernisme, i a de la gent per dire : per me far plaser, te fau venir coma n’autre visitar la granda, aquò i fará plaser maitot.

Žižek esplica que ‘quò es ‘na faussa libertat qu’aquela chausida, la seconda es mai violenta que la prumiera perdeque es pas una chausida, mas ‘n’obligaci’ basada sus los sentiments.

o(-!-)o

E d’escotar per lu benaise…

La setmana passada, Serge Latouche eriá convidat (>fr).

o(-!-)o

Publicités