古事記 – kojiki – Dire coma quò se passet autravetz

古事記 – kojiki – « Dire coma quò se passet quante las polas avián un rasteu davant », es un libre qu’amassa las istòrias de las originas de las islas que fan lu Japon de bana coma los contes sus los kami, qu’es de dire los diaus, adonc la mitologia.

I a gaire de gent per pas dire que qu’es lu pus vielh escrich japones, sus lu païs e dins la linga1, qu’eisista d’enquera aüei.

Qu’es l’emperor Temmu qu’avià damandat au Hieda no Are de culhir las istòrias sus las tradicions, las legendas esparsidas un pauc pertot dins lu Japon d’aqueu temps, per ne’n far una compilacion « orala », un sòu raconte, per ne’n far pas pardre de bocin maitot.

Quante Temmu moriguet, l’afar fuguet tornada presa per l’imperatritz Gemmei que comandet au Ō no Yasumaro de coijar sus lu papier lu colectatge dau Hieda no Are.

4 mes passats, eu ufriguet lu 28 de genier de 712 lu kojiki a l’imperatritz. Sem sens saber se eu manhet l’òbra de basa.

Lu libre es divisat ne’n tres grandas pertidas, ente vesem ‘ribar las divinitas, los diaus, las divessas, coma untau, una tala es lu filh o la filha, d’untau o d’una tala. Puei son los emperors daus ciaus que ‘riban per ne’n ‘chabar quitament sus un ordre cronologique per justifiar lu poder ne’n plaça, pensatz be.

Tant iò dire, la legida dau libre es aisada, mas tant passionanta coma lu papieron dins las boitias daus remedís. Dise pas per los passionats dau shintoïsme, las estudiantas dins l’istòria de la linguïsta dau païs, mas autradament es pas una meravelha.

Longtemps mes de costat perque farjats de fablas, i a desempuei quauquas annadas de la gent per lu tornar estudiar perque quò resta una sorça de rensenhaments pròpra au Japon.

Tant iò dire maitot, d’aicí la fin d’annada, pense aver legit son cosin de chas los de Bretanha, parle aquí dau Barzaz Breiz.

kojiki

Kojiki, revirat per Pierre Vinclair, mai de las caligrafias de la Yukako Matsui

 

  • Lu kojiki se pòt legir aquí (>fr) d’un biais beleu pus clar.

_____

1 – per far lu sabant sabantós : qu’es dau japones de l’atge superior, VII-VIII sègle, lu dialecte dau canton de Yamato.