Lu pes daus secrets – SHIMAZAKI Aki

‘Tenci’ chap d’òbra, ‘tenci’ chap d’òbra. Aquí tot quò que fau ne’n dire per vos la far tirar entau lonja de pas ne’n’ver jà fach la legida.

Veiquí la persentaci’ daus libres, dins l’òrdre daus limeròs, emai ‘quò n’aguesse gaire de sens perque l’istòria es sensa estre la mesma.

Tsubaki – lu nom de la flor daus cameliàs : dins ‘na letra laissada per sa filha, de legir apres sa mòrt, Yukiko, ‘na surviuvanta de la bomba atomica, parla de quauques bocins de quante l’eriá p’ita puei goiata chas sos pairs, de’n prumier dins Tōkyō, puei a Nagasaki.

‘La torna boirar los afars de la vita d’una familha trabalhada per las mentidas dau pair, ‘quò que la menet a far un murtre.

Hamaguri – cauquilhatge : dos eifants apres jugar dins un jardin de Tōkyō, Yukio mai Yukiko, se fan ‘na promessa de fidelitat e per aquò marcan lurs noms au dedins d’un cauquilhatge. ‘Riba l’adolescença, se tornan trobats a Nagasaki, sens se tornar coneitre ; los sentiments qu’ilhs an l’un per l’autra, quò que los manha, lur seriá bandit ?

Tsubame – ironda : Quante i aguet lu tremolament de terra ne’n 1923, lu qu’esbolhet lu canton dau Kanto ne’n fasent mai de 140 000 mòrts, la goiata de Corea, KIM Yonhi, devenguet per subreviure, KANAZAWA Mariko, coma se l’eriá eissida dau Japon. A la fin de sa vita, veusa, mair d’un filh que fai lu chimiste, grand mair de très pitits eifants, lu misteri de sa naissança li es balhat.

Wasurenagusa – miosotis : apres un prumier maridatge mancat, TAKAHASHI Kenji descruba qu’eu es sterile. Aclapat, eu daissa la meijon de la familha. N’i en a pus que per sa nuriça, Sono. Un jorn eu fai la coneissança de Mariko, que viu sola mai son filh Yukio. Ne’n tomba amorós, la marida contre l’eivis de sos pairs.

Quarante six ans apres, retraitat e aflacat, eu charcha las traças de la Sono. Quante eu troba sa tomba sus laquala es marcat lu nom de la flor de la Senta Vierja, Wasurenagusa, entau fasent, eu compren las originas de sa naissança e lu malur de sos pairs.

Hotaru – luchachambra : a la sason daus verms lusents, las luchachambras, Tsubaki passa veire sa granda TAKAHASHI Mariko. ‘La es luenh de pensar que ‘quela-quí vai i balhar lu secret que minja sa vita desempuei cinquanta ans alora que ‘la poguet jamai ò dire a son òme. Estudianta, Tsubaki apren tras ‘quela confeci’las leis cruelas de la vita : l’einuscença e la simplessa de las jòunas filhas son mai d’una vetz abusadas per daus òmes de poder e d’eisperiença, entau fasent, lur destinat se’n troba per jamai desboirada.

L’eimatge ven d’aqueu siti (>fr) consacrat a la legida d’òbras japonesa, lu liam ubra la paja de l’autrizt.

SHIMAZAKI Aki es nascuda au Japon mas ‘la viu a Montreal desempuei ‘na desena d’ans. ‘La ganhet daus pretz per doas pertidas d’aquela pentalogia.

« Lu pes daus secrets » es un raconte que nos pòrta dins lu Japon imperiau, lu de las annadas 1920 d’aici lu Japon moderne, lu de las annadas 2000. Es l’istòria de gent faça a la destinat, de la gent que fan beucòp per viuvre faça a la vita, maugrat que las istòrias non barradas, non eisplicadas, sus laqualas es pausat un barradon lord, aquelas istòrias semblan tornar eissir, d’una generaci’ l’autra.