La vacha que desirava pas ‘chabar ‘charpida – Meschaënt karma

Dos libres dau David Safier (>fr-pocket), dos libres sus la vita de tots los jorns, sus la mòrt maitot, dos libres per rire, e fau pas aver paur de rire dins lu temps que vivem, quò costa res, per aura.

La vacha que desirava pas ‘chabar ‘charpida – conta la vita de Lol, ‘na vacha qu’un jorn troba son amoròs apres jugar au doctor mai una autra. Esmalida de la situaci’, ela vòu morir de’n prumier, puei se ravisa e desira viura la vita d’una vacha dins un prat, aures. Un jorn, ela compren çò que los umans esperan de las vachas, mai que tot de las pus grassas. Conselhada per un margaud que li parlet de l’Inda, un païs que la gent prenen las vachas per de las divas, un pauc coma la Vacha Cosmica, Lol s’enfugís mai sas amijas.

Lu monde es pas ‘na permenada aisada per una tropelada « soquesada ».

‘Tenci’, que lu rire vos prenha pas aisament, que pensatz que rire fai venir de las marcas autorn daus uelhs o qu’aiatz de las consideraci’s grandas sus çò qu’es la literatura deu estre, subretot, dubrissatz pas ‘queu libre. Eu vos semblará mau escrich, leugier-leugier e i a tant d’autres chausas de far dins la vita, perdatz pas vòstre temps.

Meschaënt karma – conta la vita d’una animatritz dau montra-colhon, la Kim Lange, afe, conta sa mòrt, esbolhada per… vos daisse descubrir l’afar. Una vetz mòrta, ela encontra lu Budhā sos la fòrma d’una formiga, veiquí l’afar, per quitar lu cicle de la reïcharnaci’ ne’n formiga, fau ‘meliorar son karma…

Karma es un mòt de la linga devanagari – कर्म – que vòu dire accion.

Los eimatges son tirats dau site de Pocket

Publicités