Maubre

« Marbles », maubre per iò dire dins la linga de chas nos, « Maubre » es ‘na seria de fotografias presas per la Ingrid Berthon·Moine (>en).  Coma iò prometí lu darrier bilhet, parle aüei de colhas.

‘Questa erpausici’ es ‘n’erpausici’ de colhas. ‘Tenci’, pas l’insurta que sei pas lu darnier de pas l’usar, non, las colhas vertadièras. ‘Las son ‘quí erpausadas sus la mòda de la repetici’, p’una pus gròssa que l’autra… un pauc coma dins los defilats de la festa nacionala apres ‘ribar 😉

marbre
N’autres am pus qu’a esperar « l’armada nòstra » per ‘visar losquaus an las pus gròssas.

Per gardar un costat culturau ad aqueu cibercaier, parlar d’una tala erpausici’ es per me l’enchaison de parlar d’un libre dau Pascal Quignard « La nuit sexuelle ». Es ‘na fòrma d’enquesta « tras l’eimatge » sus la prumièra de las tres nuechs de l’umanitat : avant d’eisir, qu’eriá la prumièra nuech, la nuech uterina, ‘na vetz sautat, a la fin de la jornada es la nuech negra ente duermem e que raibem ne’n son mitan, e, per ne’n ‘chabar, apres la mòrt, l’arma se copilha* d’un biais que podem gaire prener lu davant.

Quante chavam nòstre cur dins lu silenci de la nuech, am vonta de la granda paubretat daus eimatges que nos fargetem sus la jòia.
Eriá pas ‘quí la nuech que faguí concegut.
Es mauaisat d’estar au jorn d’avant que v’autres sàietz…

Sens la sciença dau Quignard, un tau boiradís d’eimatges passariá nonmàs per un boiradís legieradament cochon, mas aürosadament i a lu legir, entau fasent lu libre dubra ‘na tireta de lutz sus la nuech negra.

_____

* es pas entau dich dins lu libre. Fase ‘quí referença a la creiença dins las doas armas, l’uma que creba coma lu o la mòrt-a, l’autra que torna se recorquilhar dins los ciaus a l’espera d’un autre còrp per s’incarnar. Es entau contat dins la Bible, dins los contes tradicionaux daus aborigènes. Podetz iò legir dins mon libreton « p’itas istòrias ».