Dans la Combi de Thomas Pesquet

Porriá ne’n contar e dire que trobí lu temps de legir quante ‘ní ‘chaptar un bilhet de tren per ‘nar a Esgolesme. Que vertadierament fau ne’n voler per voiajar mai ‘na becana sus las linhas dichas « regionalas », afe, qu’es un secret per degun que i a dau monde per ‘bilhar l’anciana companhia dau tren de las pelhas de la modernitat per far ben… per la mielhs balhar au « merchat ».
Porriá dire que qu’es a l’enchaison dau festivau de bandas dessenhadas (>fr)… mas non, luenh d’aquí, qu’es mon pitit costat « la masqueta e la pluma » (>fr) que zò vòu.

Dans la Combi de Thomas Pesquet

Ai descubert la Marion Montaigne dins La Revuda Dessenhada (>fr) de per sos reportatges grafiques coma aquò se ditz.

Qu’eriá plasent de legir per un chause que parla de sciença. ‘Questa vetz, ela nos conta coma ‘la montet aus ciaus, afe, pas ela, la verja nimai, ela parla dau Thomas Pesquet.
Es entau que vesem fau mai que lu dessenh d’una ovelha per assuausar lu Pesquet goiat. Eu vai frutjar sus la terra mas eu sonja au cosmòs. Es entau que un jorn de 2008, ‘na p’ita annonça vai li balhar la clarda e ne’n far lu tipe valhent que coneissem.
Lu biais de contar l’entrainament, los afars de l’espaci — v-òc-es aquò se parla daus chiadors —, dau coma es rinjada l’estaci’ espaciala, breu tot aquò es plasent, fòrt plasent. E l’uman Pesquet es pas obludat dins l’istòria, luenh d’aquí, tot coma la sòa familha, sos amics.
Cosmonaute es pas un mestier aisat, surtir dins l’espaci es mens aisat que tenir sus ‘na becana per temps de nevia, e, passats los 6 mes, 400km per dessus las nòstras testas, vei-lu-quí, lu cosmonaute apres tornar ‘ver afar coma lu « planchier de las vachas ».

Per ne’n chabar : far rire et far descubrir la vida scientifica son los dos grands afars d’aqueu libre, de bon legir.

dans-la-combi-de-thomas-pesquet

 

  • Lu libre se pòt trobar dins las vertadièras librarias. Eu es esdidat chas Dargaud (>fr)
  • Lu ciber-quasernet de la Marion Montaigne se pòt legir aquí (>fr)