Haiku erotics – Jean Cholley

Ò ! V-òc-es. Ò ! Ò !
A ! A ! D’enquera ! V-òc-es.
‘Ribe ! Òc, parte.

Se v’autres esperatz ne’n trobar daus entau dins ‘queu libre, lu darnier presentat ‘vant lu NaHaiWriMo, passatz ‘queu bilhet.

Pitits chamaus.

‘Queu libre « Haiku erotics » es ‘na persentaci’ de quauques poëmas popularís de la fin dau sègle XVIII d’aici la desbuta dau XIX, au Japon. Un poëma per dire lu momint, un lanç de l’umor, quò que setz mau lunat o dins vòstras bonas, un poëma per jugar coma los mòts.

L’eimatge es tirat dau site « haikunet » (>fr)

La font prumiera es la vita sessuala de tots los jorns, la daus monges, de las cortisanas, de las veusas o de las pauchas…. Òmes que femnas fan lu spectacle, per lu prumier plaser dau poëta, puei, es la volontat dau libre, per lu nòstre.

La paucha de la veusa
Dins lu bureu d’un temple,
Suert de sos vòts un monge.

Au mitan dau chamin,
Intra un monge dins ‘na gargòta
Ne’n suert un medecin.

Dins las pensadas daus haijin, las damas dau chasteu ‘chaptavan daus « olibòses » coma lu restant d’una lista de pervesi’s, fau beleu dire perversi’s.

Dau roge per las pòtas,
De la cresma, e un biron,
Compta lu comisarí sus sos dets.

Pas coma la charn cruda
‘Quò pesa gaira dins los budeus
Ditz l’apoticarí.

La dama dau chasteu
Perdet un quauquares.
‘La a pas l’eime de iò far querre.

Dins lu còble

Quante eu quilha lu mast
La femna se preissa
De prener la barra.

Dins tot lu canton,
Sens ne’n res saber, l’òme,
Sòu se retroba.

Surpres per son òme
Que descubra que sa femna
A quatre chambas.

Sus las veusas

Lu prestaire de libres
Ne’n a maitot
Per las que saban pas.

Dins la meijon de tè,
La veusa es coma la serp,
E l’òme un moschilhon.

Paubra tristessa,
Dau papier de seda, la veusa
Fai que se moschar.

(lu papier de seda eriá usat per envelopar los olibòses)

Chas Picquier (>fr)

Chas Picquier (>fr) totjorn, mas dins un autre stile, « haiku dau temps present » de la MAYUZUMI Madoka, revirat e persentat per Corinne ATLAN.

Las brumas montan…
Dins la veirina
Los manequins marmusan.

Un libre de quauques 84 haiku, persentats per sasons e mòts de sason. Daus haiku escrichs dins lu linhatge dau Takayama Kyoshi, se-mesma disciple de Masaoka Shiki, lu mestre de la celebraci’ de las flors e daus auseus, ‘na via que tascha de parlar de las sasons tras las activitas umanas.

La metrica es respectada, las qualitats vogudas per Bashō, simplicitat, sinceritat, far ‘tenci’ aus pitits coma aus grands… i son.

____

Eu torna, lu mes daus haïku, lu NaHaiWriMo, ujan dins la linga occitana maitot. Lu temps d’una mesada, vos fau escrire d’aquilhs pitits poëmas sus ‘quò que vos passa per la testa, o sus ‘na tematica coma iò fan los-las haïjin de França ; perpause d’alhor de segre los mòts que lur site fbq balhará per los e las que troban pas l’inspiraci’…

nahaiwrimoc

fau eïperar febrier de 2014, e i a res de ganhar.