Las p’itas becanas — KOYAMA Keiko

Sàietz los benvenguts au Strade Bianche !

Non, qu’es pas un cafè ente las pizzas son mai que bonas, enquera que, qu’es nonmàs un comerci de becanas !
Lu patron daus luecs, Velotra, ne’n sap un bocin e la testa dins lu volant, eu fai çò qu’eu pòt per los, e las, que ‘chaptan.
Intrar per viure de las aventuras cranas dins lu monde de la p’ita reina, de bana coma las praticas estranhas dins sa botica.

Forar son nas dins ‘quela manga es pas daus pus malaisat, lu trach es coma dins los libres per los goiats, las istòrias pas tròp lonjas e aisadas de comprener.

Los personatges son repersentats per daus alimauds, entau fasent de las personalitats cicliescas poden estre eimatjadas, per eisemple lu borrut iò es per un singlar, la femna que fai de la becana per perdre dau pes l’es per una capybara¹, lu corsier per un margaud — de chas « chat-va-vite » — o d’enquera l’esportiu per un alpaga — que s’espiauna ~ s’espela avant de far lu torn de França² — e d’autres e d’autras.

Las istòrias son l’enchaison de persentar un biais de far — anar trabalhar, anar a l’escòla, los lesers, la corsa, lu torisme — o ‘n’aisida — l’util per frenar, çò qu’es un deralhor, coma rotlar sus la rota — breu, lu monde de la bicicleta.

De segur, las plasantarias son un pauc totjorn las mesma mas pas los endrechs, ne’n mai d’aquò, los personatges son plasant e ‘chabam per i estre ataschats.

Qu’es pas la manga dau sègle mas lu limerò 1 tant coma lu 2 son pas de meschaënt legir per los grands e los mens grands.

petits-velos-1-komikku

Dins la cuberta quò se ditz que la mangaka a un « ruby » de chas Specialized© per far de la rota e daus « BD-1 » e « Carry Me » que son de las becanas plejantas, aisadas de prener coma se dins lu tren per eisemple per anar se permenar.

Nòtas :

¹ capybara : per l’ora qu’es lu ronhaire lu pus gròs descubert sus la planeta. Viven dins l’America dau sud.

² lu tour, lu Giro, la Vuelta son las 3 grandas corsas nommadas dins lu libre, oposadas a las classicas coma la « Strade Bianche » e au « keirin ». Lu « keirin » sautet au Japon lu lendeman de la guerra de 15 ans, qu’es ‘na corsa sus pista, fòrça populara perque lu monde pòt jugar de la moneda.