Bohumil Hrabal – ‘Na solituda que mena bruch.

Japonesarias e tot-lu-totin son mes de biais, sus ‘na mòda « pausa » per aura, adonc, apres la Scandinavia, veiquí un bilhet sus un autor tchèque, lu Bohumil Hrabal, que ditz de se-mesma

« venguí au monde per que « Prilis hlucna samota – ‘Na solituda que mena bruch – Une trop bruyante solitude » fuguesse escricha ».

Vau pas ne’n contar, es pas lu genre de la meijon, pensatz be, descrubrissí l’òbra per l’adaptaci’ ne’n bandas dessenhadas que ne’n fagueten los Lionel Tran, Ambre e la Valérie Berge.

Un chap-d’òbra dins lu grafisme, dins lu biais d’aranjar los dessenhs, dins la scenarisaci’.

Un chap-d’òbra dins lu pessimisme d’una vita « de pauc » menada sans jamai tròp ne’n dire.

‘Quela bede es lu genre de libre qu’un còp barrat, o v’autres charchatz lu libre originau per lu legir, veire, comparar, comprener un pauc mai… o, una vetz barrat, vos charchatz d’autras òbras daus dessinhators vos sonjant que l’un de l’esquipa deu aver un amic tchèque o ‘n’amija e que qu’es un libre realisat per se far plaser, qu’un tau libre pòt pas eissistar per de v’rai… e que beleu los autres lurs libres son farjats sus la mesma mòda d’un raconte poderós servit per un crane grafisme.

Sei de la seconda possibilitat, e ‘chaptí d’autres libres dau Ambre, dau Lionel Tran… d’aicí qu’un jorn descubriguí lu libre de pocha chas un boquiniste.

Lu pilon, tau es lu sugier d’aqueu libre.

Desempuei 35 ans, Hanta esbolha los libres ancians sos ‘na pressa. Eu espotinha, eu beu, eu espotís, eu banturla dins Prague, la de tot los jorns, la d’un monde de l’eimaginarí. Li damandan d’esbolhar la cultura, se ne’n sauva daus bocins de la mòrt…

Un conte pitit emai la legida ne’n siguesse pas aisada perque es sarrat, beu, poëtique e que mai d’una vetz quò fai mau a l’arma.

  • Lu site (>fr) de l’esditor R. Laffont (d’ente es tirat l’eimatge)
  • Lu site (>fr) de « 6 Pieds sous terre », l’esditor dau Lionel Tran e dau Ambre

Revirat dau tchèque per Max Keller. Ai pas vut lu filme (>fr) tirat dau libre.