Un desboiradís de libres

Veiquí quauquas nòtas sus daus libres, mas de las bandas dessenhadas, que son ‘ribats sus los planchons de ma biblioteca.

« Sapiens, la naissança de l’umanitat » — Yuval Noah Harari

La banda dessenhada es estada tirada daus mòts escrichs dau libre eponime e vei-nos-quí menats dins la granda istòria de l’umanitat, de la sòa evoluci’.

Umanitat es de prener aquí per n’autres, Sapiens, emai i aguesse quauquas planchas sus los cosins de la familha, Neandertaus, Florès… n’i a mai que sem los sòus d’aver coneguts la « revoluci’ cognitiva » i a 70000 ans d’aquò, çò que nos faguet dominar lu monde d’aici a en estre la causa granda dins la disparici’ de la « mega-fauna » ‘na vetz ‘ribat ad un endrech.

Parlar de revoluci’ cognitiva per n’autres, aquò vòu pas dire que Neandertau aviá pas la capacitat de far de « l’art » o b’etot de « l’abstracci’ », emai lu libre ‘guesse un « biais » — sapiens se sap ganhant de la batalha de l’evoluci’… per l’ora — e obluda de ne’n parlar.

Lu conte nos permena au fiu de las pajas, e jurtament, es un daus benfachs de la revoluci’ cognitiva, per ne’n contar.

  • Sus las capacitats d’abstracci’ de Neandertau :

À l’aide de méthodes non invasives, les chercheurs tentent de dater et comprendre une structure réalisée à base de stalagmites cassées et disposées en plusieurs cercles. Visiblement aménagée par Néandertal, cette structure pourrait représenter la plus ancienne trace humaine au monde en milieu souterrain profond.

Aquí un reportage dau CNRS (>fr).

« Open Bar » — Fabcaro

Dins un estile completament diferent, un libre per desboirar la vida de tots los jorns, mai-que-tot la facilitat que ‘la pòt aver de davalar dins l’absurditat. Ad aquò, lu dessenhator empeuta un bon bocin d’umor negre e vei-nos-quí de rire, rire e tornar rire.

La persentaci’ dau Fabcaro sus lu site (>fr) de la « p’ita meijon d’edici’ » que lu descubret.

op1-bb378

Mangas

« La Divina Comedia » — Dante

L’eideia es de persentar lu chap d’obra dau Dante, benleu per ò far comprener aisadament a… dau monde, mas pòde pas balhar lu nom de la buta.

Lu dessenh es òrre ad un punt que se pòt pas dire, lu raconte es colhon. Emai finalament lu libreton poguesse passar per un « resumat », n’i a p’un plaser de prener a la legida.

Aurosadament, i a lu film (1911) que persenta « l’Infern » qu’es d’enquera de poder vieisar sus la tiala :

« Las p’itas bicicletas » — Keiko Koyama

Lu limerò 9 de la seria contunha las cronicas d’aqueu monde de la bicicleta que se passan dins lu boticon de Monsur Veloira.

Dins lu monde, un pauc neci, persentat dins ‘queu limerò, i a un « boquetin » que vai far sa prumiera corsa, ‘na lapina apres s’entrainar coma un… lop — 🙂 — e, ‘na vetz de mai, Isabela la jornalista, ‘na loira filha, es apres charchar l’amor ; n’autres sabem que ela es amorosa de Veloira desempui sa prumiera venguda dins la seria.

Quò es per los goiats e las goiatas, mas los grands poden legir los libres per eifants, v-òc-es, ai 10 ans.

Aviá parlar dau limerò 8 sus mon ciber-caier « becana » :

Les petits vélos n°8 – Keiko Koyama

« Tinĉjo & la templo de l’ suno » — Hergé

Mon prumier Tintin dins la linga universala.

‘Na miraudia ente i a beucòp de plaser de legir las viradas de las insurtas dau capitaní Haddock. Vos balhe la per « tonadre de Brest », que forçament, « Brest » deu res dire a dau monde de… d’Austràlia, adonc, quò estat virat per « tonadre mai trompeta — tondro kaj trumpeto ».

Los Dupond & Dupont, ilhs, son estat virats ne’n « Citserono & Tsicerono » per far un amusament sus lu biais de dire la linga.

« Alfonsina » — Joan Negrescolor

Alfonsina Strada es la sola femna que ‘chabet un dau tres grands torns per los òmes, lu Giro, ne’n 1924.

Una femna de legenda dins un roman grafique, fòrt colorat, quitament coma las reclamas d’autravetz. Una istòria corta, benleu tròp, mas la determinaci’ de la goiata eria granda, ela que ganhet sa prumiera corsa a 13 ans.

Joan Negrescolor es un dessenhator de Catalonha.

J02795_Alfonsina_Couv.indd