Las confituras fachas au Cookeo+©

Zò ai desjà disch aquí, ai un noveu amic, roge, rond, a vapor… una « cocota electrica » res de mai, quitament mens aisada per cueisinar qu’un cuech-vapor « estandard », mai rapide quau-que-siàia.

Forçament, sus la tiala, trobí de que far de las confituras.

A la desbuta, aviá pas compris que… vau mielh pas las far coma lu chause. Atz las topinas, atz un biais de far, contunhatz de far coma v’autres ò fasetz desempui la nuech dau temps.

Dos exemples mancats

Gialada de crochets

Per la confitura de crochets, quò es tardier, balhe los ingrediens per l’annada propchana :

  • 250 g de flòrs (crochet o pissenliech)
  • 1,5 litres d’aiga
  • 1 kg de sucre
  • lo jus d’un citron.

Lu Cookeo cuech fòrt rapidament, e, legissí que faliá metre lu sucre NE’N MESMA TEMPS que la prumièra tornada de 10mn.

Pòde dire que non. Fau far… sabe pas de tròp !

Me songe que fau far cueire nonmàs las flòrs dins l’aiga, beleu 10mn « sos pressi’ », puei daissar pausar avant de iò tornar cueire TRADICIONALAMENT, qu’es de dire dins ‘na topina, mai lu sucre, lu citron, quitament 1 ora de temps avant d’entopinar.

Per lu còp, la jalada es mancada mas, pas ‘peisonada. Los mandins, ne’n versa sus mon pan.

Confitura banana-kiwi

Coma aime pas demorar sus un chause mancat, me disí que beleu per las gialadas fau restar sus las tradici’s e que lu Cookeo es fach per los gòsts noveus, per eisemple « banana – kiwi ».

Prenguí 1kg de fruch, meitat banana, meitat kiwi, 1/2 kg de sucre, un pauc d’aiga (20cl), una culhera de vinagre de cidre meijon.

Gietí tot dins la cuva principala dau Cookeo, e, ne’n mòde manuau, cueisson « sos pressi’ », 10mn de temps. Coma dire :

FAU PAS FAR AQUÒ !

De segur, i a ‘na securitat per pas far eisplosar lu Cookeo mas, sabe gràn çò que se passet. Lu sucre deguet bochar la valva 1, la valva 2, la securitat, lu besilh de darier… lu truc desbutet un concerto de « bip -bip » e quò fumava, e quò sentiá lu carameu !

Paubres, creguí que lu Cookeo eria crebat, mas non, ‘na vetz netiat a l’aiga, d’empertot : lu cubercle, las valvas, lu besilh, lu pitit chause, la cuva… Eu torna far la sopa.

E la confitura ? Finalament, la passí un còp au molin avant de l’entopinar.

Senta Gineta podiá pas m’aidar dins ma descuberta dau monde moderne (eimatge d’archius)

Fin finalament, sei d’enquera aquí per escriur de las connariás, adonc, qu’eriá mancat, pas empeisonat.