De las novelas dau Cookeo+©

Zò ai desjà disch aquí, ai un noveu amic, roge, rond… a vapor. V-òc-es, qu’es una « cocota electrica » res de mai, quitament mens aisada per cueisinar qu’un cuech-vapor « estandard », mai rapide quau-que-siàia.

Qu’aguesse compres e me fau esperar un pauc per aver « una aisida » que se pausará dessus per far daurar coma dins un vertadier forn.

Per aura, veiqui la seguida dins mas esprovas per dondar lu chause (>lm).

Avant-dire : aní far lu bici-culhor dimenc darnier. D’en prumier qu’eriá per atenher de las chifras « rondas » sus mon comptador de bicicleta, aquò será contar deman, beleu, chas las becancanerias (>fr), puei, forçament, trobí de las ortrujas, l’enchaison de far una sopa.

Sus la tiala

Sus la tiala ocitana, aquò parlet « botanica » :

Marie Baudoin qu’ei ortalèra, estudianta en antropologia etnobotanica e especialista d’erboristeria. 

Sopa d’ortruja e « maki »

La sopa

(per doas personas)

i a doas espeças d’ortruja aquí
  • De las ortrujas (segond l’enja de 10 a 20 testas)
  • 1 inhon copat
  • 3 pomas (terra)(de las p’itas) copadas
  • 700ml d’aiga
  • De la sau (o un bolhon)

D’en prumier, fau far bonhar las ortrujas dins de l’aiga mai un pauc de vinagre blanc.

Puei, fau las gietar dins la cuva principala dau Cookeo, mai las pompiras, mai l’inhon e ajotar l’aiga.

Aquí, segond lu vòstre regima, fau pas obludar ‘na pinçada de sau o un bolhon de legumas… o res.

Cookeo+ : mòde manuau, prener la cueisson « sos pressi’ », 10mn de temps.

Molinar fin o pas, segond vòstre gost. Podetz pebrar, fromatgar… setz queraque mestre chas vos

Los « maki »

(per doas personas)

  • 250 g de ris per « sushi »
  • 450ml d’aiga
  • 8 fuelhas d’alga « nori »
  • 1/2 cocombre copat dins lu sens de la lonjor
  • 8cl de vinagre de ris
  • 1 culheron de sucre
  • una pinçada de sau
  • Dau gengimbre rose marinat
  • Dau « wasabi », de la sauça « soja »
  • /!\ Una nata de bambo o un motle per maki e/o nigiri

Fau preparar lu ris, qu’es de dire que fau lu passar sos l’aiga una vetz, doas vetz, d’aici que l’aiga colesse clara (per dire la vertat, coma la besonha cues fòrt rapidament, ai metut lu ris de cueire dau temps que las fuelhas bonhavan dins l’aiga. Adonc, ai servat ‘quela aiga per far banhar las ortrujas).

Dins la cuva principala, fau gietar lu ris coma l’aiga.

Cookeo+ : mòde manuau, prener la cueisson « sos pressi’ », 10mn de temps.

Dins un veire, fau boirar lu vinagre, lu sucre, la pincada de sau.

‘Na vetz lu ris cuech, fau lu metre dins un topin e lu boirar coma lu vinagre sucrat. 5 minutas de temps.

Aquí, i a l’escola de la nata, qu’es de dire, pausar ‘na fuelha d’alga, metra ‘na cocha de ris (1cm), placar ad un endrech lu cocombre avant de rotlar la fuelha. I a un còp de prener avant d’i ‘ribar.

I a meitot l’escòla dau motle : pausar l’alga dins lu motle, pausar cubrir ras de ris, ajotar un baston de cocombre, retornar la fuelha avant de cubrir coma la seconda meitat dau motle e preisar. ‘Quí maitot, i a un còp de prener.

Per aver ‘na bona resulta, i a la perparacion dau ris, mas, ‘na vetz lu rotlon fach, fau lu copar… coma un bon coteu ; podetz vieisar sus la fotografia que ai metut tròp de vinagre, adonc lu ris eria tròp aigat, e, per ‘quela sòca (lu plateu per persentar los maki e los nigiri), ai pas pres lu bon coteu (me sei mai aplicat per la seconda sòca, mai lu coteu japones…).

Avant de servir, i a dau monde per apondre de las granas… me, aime mielh coma un brejon de wasabi e de la sauça soja.

Per far los nigiri, qu’es un pauc parrier. Cope una fuelha de nori ne’n doas pertida. Una banda dins lu motle dau bas, pause un pauc de ris, una banda dessus avant de barrar lu besilh e preissar.

Puei, fau prener un bocin de gengimbre (o dau cocombre…) e lu pausar dessus.

Persentaci’ daus motles/monles

chas Tupperware©

La granda diferença coma lu filmonet e que passe pas lu còp de pinceu mai de l’òli de sesame (cresi).

Un commentaire

Les commentaires sont fermés.