Falafelas leu-leu – recepta dau veganistan

Avant de balhar ‘na novela recepta, me fau dire que vene de tornar prener las comandas de l’aparança d’aqueu ciber-quasernet. Qu’es ‘chabat per v’autres de ‘ribar e tornar trobar tot desboirat, las colors, las tiretas o sabe que…

Coma i sei ‘trapat, deve dire que balhe ‘quí de las receptas dau veganistan mas sei nonmas un minja-raiça, e las receptas, qu’es aures perque dau monde, dins ‘quela periòda de convidaci’s los uns chas los autres, son totjorn de ‘pelar per me damandar : « ai un vege chas me, sabe pas de que far ! » coma se los veges erian la reina daus anglès.

Afe, apres las confituras, apres los faus gralhons, veiquí la recepta de las falafelas leu-leu.

Falafelas automaticas

V-òc-es, sei pas fiar de me, mas, ai mai d’una vetz fach las falafelas coma ‘na pouvera ‘chaptada dins las espiçarias de biobiolandia.

Es aisat de far, d’alhors la recepta es marcada sus la boitia :

Ajostar de l’aiga, far las boletas e cueire dins l’òli.

Falafela rapidas

Fau un pauc mai de trabalh, mas pas de tròp :

  • ‘Na boitia de peseu becut ;
  • ‘Na gossa d’alh ;
  • Dau cumin (podra) ;
  • D’òli (‘na culhera a sopa) ;
  • De las erbas (segond vos gosts) ;
  • ‘Na pinçada de sau.

Perparaci’

Esgotar los peseus, los esbolhar coma los autres aliments mai un molin electrique, d’aici ad aver ‘na pasta lissa.

Far las boletas — dins una boitia de 250g de peseus, i a de que far 10 a 15 boletas — puei, per chamjar de las far cueire dins l’òli, i a gaire, las faguí cueire au forn :

  • Far chaufar lu forn 20mn a 200°C, pausar la grilha un papier (sulfurisat o los chauses qu’utilisatz de costuma), pausar las boletas sus lu papieron avant d’enfornar.
  • I a dau monde per las cubrir d’un papier d’alú, mas, me, aime mielhs pas l’utilisar. La temperatura pòt chamjat segond vòstre forn, segond sa grandor… Coma totjorn, fau un pauc adaptar la recepta a son gost e a sos utils.

E la sopa d’alh – lu torin

Ai legit un quauquares sus lu torin aquí (>fr).

Aquò me manhet de pas saber çò que qu’eriá. Au telefòne, ma maire se metet de rire que qu’es l’autre nom de la sopa a l’inhon, e que, coma per que los minjesse, me fau pas los veire, jamai ‘la ne’n faguet, dau torin, autradament que coma de l’alh. Ela apelava ‘quò ‘na « sopa blancha de pan » (perque ‘la la nos balhava de minjar sus dau pan dur).

Balhe aquí ‘na recepta de basa, pas la de ma maire, la que deguí trobar chas Joseph Delteil dins « la cuisine paléolithique », un occitan contrariat ‘queu-quí. Pòde pas l’acertar que lu libre es pus chas me.

Afe, qu’es aisat de far, veiquí la basa :

  • 10 goças d’alh (segond la varietat, quitament ‘na testa) ;
  • De l’òli (lu fond dau « wok »°, beleu 10 culheras a sopa) ;
  • 100g de farina ;
  • 1l d’aiga.

Perparaci’

Fau esbolhar l’alh dau temps que l’òli (oliva o virasolelh) chaufa. Gietar l’alh esbocinada dins l‘òli e remudar d’aici que l’alh venguesse daurada (/!\ pas brutlada)(5 bonas minutas, pas mai).

Ajostar la farina et remudar per aver ‘na pasta blancha (5/10 minutas segond la farina, lu fuòc…).

Ajostar l’aiga e far cueire d’aici que ‘quò bulhissa.

Apres la perparaci’

Atz notat que ai pas metut de sau. Adonc, per la recepta de basa, v’autres setz liures de metre ‘na pincada de sau, o un cube de bolhon (e perque non ?), o res que per eisemple ‘natz metre dins lu torin de las algas (nori, wakame…)° o daus champanhòus (shiitake per eisemple)°.

Atz beleu daus amics dau veganistan, adonc, lu torin pòt estre versat entau sus dau pan, de las pomas.

Atz beleu daus amics sens-gluten (qu’es ‘na vertadiera malaudia avant d’estre vengut ‘na moda), adonc podetz beleu metre uòu dedins.

Atz beleu daus amics dau veganistan e sens-gluten, la sopa pòt se minja entau.


Nòta : °v-òc-es, sei un « bobo » 🙂

2 commentaires

Les commentaires sont fermés.