Darnier tragier… per un temps

Aier mieijorn, qu’eriá lu darnier tragier ne’n becana per s’entornar dau trabalh. Aquò eriá devengut malaisat de trabalhar per los tecnicians, que mai d’unas entrepresas son baradas, emai i aguesse de la boalha per jugar coma los esquipaments de securitat e que un còp per aquí, un per alai, fau surtir.

Sei de los que desiravan chabar la setmana (i a de que far per rinjar, classar…) e aprofeichar d’estre a la campanha, mas la regla deu estre la mesma per tota l’entrepresa, e finalament, devem barrar per un temps (dau temps d’aqueu bilhet, lu qu’insistet per barrar la boita s’einuia desjà chas se, segond un messatgon).

Afe, de saber que qu’eriá mon darnier tragier de bicitrabalh, lu velò-taf daus francès, ai taschat de trobar çò que vai me mancar. Dins la biaça a l’arrier de Jan d’Auvernha, se troba ‘na pepeta de pelhas, que dins la mesada, faguet sos 380km.

Darnier chant
D’una setmana estranha
— Saber estimar.

D’enquera ‘na vetz,
Prener los buescs totjorns sos l’aiga
E lu soleh.

Tres torns de roda
Mancar esbolhar un coco
— Chanta pas ‘queu-quí.

Los auseus chantan
Tant fòrts n’en son los trilhes
— Sei lu mena-bruch.

Dins los buescs, tots los mandin, qu’eriá la sinfonia qu’epelava una prima de la bela : aquí dos canards, alai de las polas d’aiga, amont un jai que balha l’alarma, de las ‘jaças… un picatau. E dise res aquí daus chabrits, de las cervetas, daus escuròus. Tot aquò vai me mancar un pauc, e mai que tot, las colors de la ramada.

Aiga purida
Renconha sa beutat
— ‘Saleç gitona.

[La fotografia es estatda presa la velha]

Sosvener
‘Questas aigas barravan la leia
Un ser d’auratge

‘Naut portament
Ad un fideu solitari
— Ten te fiar goiat.

Far lu banturle
Sos un simbòu de vitessa
Sens mocandaria.

Estranha placa
Sus l’aubre dins la serva
‘N eivís de segre.

Becana venanta
— De segur lu momint d’i sonjar !
‘La será « pavin ».

E ‘quò fuguet entau, tot lu long dau 15 km d’entre l’entrepresa e la meijon. Coma vau aver lu temps, vau taschar de pajinar los haiku dau NaHaiWriMo, e los de 2019. Mai d’una vetz, son estats trobats lu temps d’aqueu chamin.

Coma sei pas au dessus de la lei, me ‘restí pas de tròp, que lu daissar-passar eriá pas per se permenar. Lu long d’aqueu darnier chamin, quitament degun defòra, p’unas veituras. Son pas tant las veituras que mancavan, mas de las ruas voidas tant vidas de monde es gaire plasent.

Lu darnier eimatge es ‘na galejada personala. Un amic presentet dins l’encastre dau budget « participatiu » un progier per pausar daus pitits paus lu long d’una rua per pas que las veituras se garan davant las escolas. Maugrat lu vòte popular, lu progier manquet estre metut de biais que dins la rua, I a un amic dau mèra… Finalament, los pitits paus fugueten quilhar de’n pè, sauv 3, los prevuts davant chas lu tipe, que me songe los aver trobats… « ne’n qrantena » :

Afe, l’ivern se ‘chaba deman, e me songe que saurem apreciar la prima tornada. Per aquò vos fau demoratz vius, surtatz nonmàs se i a mestier.

:—:

:—:

Une réflexion sur “Darnier tragier… per un temps

  1. Pingback: Dernier trajet… pour un temps | Becancaneries

Pòdetz far la linga de palha aquí :

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

Ce site utilise Akismet pour réduire les indésirables. En savoir plus sur la façon dont les données de vos commentaires sont traitées.