Amor de luenh 8

Vejam Rudel, perque coma mon grand, qu’es question de se. Eriá ben nècia de lu pensar païsan sens ‘na linga pròpria, se grandisset a mos uelhs d’einnocenta de dire, dins sa cosina, los vers de son veisin Rudel. Mas beleu mai, Rudel devenguet de nòstras gents merces lu grand, çò que l’escola n’ensenha gaire, ‘quela parentat d’arma, en defòra dau sègle, lu milenarí, quela permanença d’estre, de parlar, laquala forja un patrimoni de charn, de vòtz, e Rudel me devenguet parent d’en faça, per adopci’ de l’autra riba. Perque, de la fenestra de la p’ita chambra ‘bilhada de lambrís, ‘gaite la soá vila, città sul mare, e la freula barca dau viatge qu’eu faguet, crosat, per l’amor, dins sa linga, dau « dit » daus romieus a la tornada d’Antioche. Blaia m’envibla de sa legenda, blancha sus sa riba de’n faça ; dau seu amor de luenh. Qu’es un mirage d’estiu, dins l’encastre d’una fenestra. Veiquí coma se forman nos linhagtes e nòstras cartas personalas. Veiquí coma i tròbe mon chamin : i es crosadas de las linhas. Que i a doas biais d’estre sur lu fluví.
Dins lu sens que vai l’aiga, anem cap a la granda aiga ; de biais, ‘nem vers Blaia. Dins un sens, lu païsatge de l’estuarí tira, sos la libertat daus ciaus, sas linhas d’eschapada. Elas van sud-nòrd vers l’avau atlantique, l’aiga coija de las apchaduras sus las franjas de roseus gris, traça, trach que vai mai large de las islas, esbarburas d’incra rossela, linhas nejadas per la pintura a l’aiga de las ribas de l’autre costat, e la de l’orlutz dau litigí, que tremola dins lu pimpilhonadís de las brumas, plejadura virtuala. L’uelh, au luenh, s’afana e se pard per far segre dins los mondes imaginarís, qu’es d’alhors ‘quela ‘pelada que emporta Rudel, es a l’origina daus progiers de viatge vers Guadelopa e Martinica, vers Maurici ente s’entraupa lu paubre Baudelaire. Admete la convidaci’, qu’es ‘na fòrma dau raibe. Mas me, dins lu segond sens, prene lu raibe dau biais, l’anar e lu tornar dintra las doas ribas. Qu’es un voiage pitit de far lu vai e lu ven, sens aver la vira, pauc aventurós ? Veire. De la fenestra duberta vers l’est, vers Blaia, encontre ma linha d’eschapada ortogonala a la de l’estuarí, trauca. Coma dins ‘n esmiralh, las ribas inversadas, Blaia es mon autre costat dau monde, l’autra linga de mon grand, païsatge sos lu païsatge, son ranvers ‘catat. Qu’es ‘n’ istòria de mòts, d’eimatges.
— Desire me far chaufar un pauc de lach coma dau miau e de la flor d’orangier, famós per trobar lu som.
— V-òc-es, vaque, me vau me far un bon càfe negre. Vei, aime mielhs la pita traucada d’un quart d’ora que non pas un viatge de lonja traversada, ela me balha l’abisme daus espacís pensats, bòrds a bòrds, ben mai grand que tot çò qu’es luenh.
*_*_*_*_*
E coma lu trabalh comanda, nos tornarem trobar dissabde.

Pòdetz far la linga de palha aquí :

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google

Vous commentez à l'aide de votre compte Google. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s

Ce site utilise Akismet pour réduire les indésirables. En savoir plus sur la façon dont les données de vos commentaires sont traitées.