Pitits voiages lu temps daus congiers

Per ‘na vetz, me fauguet prener los congiers ne’n julhet. Res de greu, aquò ‘nava de bana coma la Veloruci’ Universala que se passava a Tors ujan. Adonc, un bilheton per parlar daus chamins.

 

Orléans > Tors

130km realisats d’un còp, sens forçar, que lu chamin es quitament plat d’empertot. Ne’n mai d’aquò, tot es estat fach per que las becanas eschivessan las banhòlas sus beleu mai de 80 % dau tragier.

I a pus malaüròs que los ciclistes apres se pradelar. De segur, un brave chamin per la toristalha fai pas ‘na politica ciclabla globala, sens obludar que fau montar sus la « rota ciclista » e ne’n davalar.

Saumur > Fontevrault

Las manifestaci’s, un còp, dos còps, perque non, mas, los congiers son estats fachs per se cultivar maitot. Davalar dins ‘n osteleria de Tors per 4 nuechs, qu’es prener la pena d’anar un pauc pus luenh que la ciutat ne’n ela-mesma. Quau que siàia, ‘na fòrt bela vila.

I a Saumur pas luenh, adonc Fontevrault. Coma sei jamai anat veire los gisants d’Alienòr d’Aquitàna e dau Richard Cur de Lion.

‘Quela vetz, prengui lu tren, que per far las visitas, aime estre fresch per pas dire « présentable ». Saumur es ‘na vila agradiva, d’aici Fontevrault i a mens de 20km, qu’es de dire res per ‘na bicicleta.

Veiquí la carta :

Lu chamin per dire la vertat es balisat un pauc pertot. L’aviá metut dins mon ordifòne mas aquò a estat per res. Ne’n mai d’aquò, aviá avieisat la carta dins lu tren. I a p’una dificultat. ‘Na vetz ribat e chamjat, visití lu bastiment.

Deve be ò dire que sabia pas grand chausa sus lu bastiment, nonmàs que i aviá la reina mas son filh ; res sus los autres reis o b’etot reinas, res sus l’anciana preison. Me songe que se charchatz dins daus libres, trobaretz de la informaci’s.

Veiquí doas fotografias presas dins la ‘gleisa, despolhada emai m’aguesse sonjat la trobar d’enquera mens « joiosa » dedins, dins un estile d’enquera mai « sec » :

 

I a pas fotòs dau Richard que bon, l’istòria conta que i a màs son cur que fuguet portat a la reina, lu restant fuguet enterrat rassís lu chasteu de Chasluç. Sei pas fetichiste de l’occitanistan.

Ne’n mai de las peiras, i aviá ‘n’ erpausici’ d’òbras modernas, ‘na monstra fòrt brava tant dins la ‘gleisa que pertot sus lu site. François Réau ‘viá ‘bilhat los Plantagenest, veiquí l’obra — dau Claude Lévêque — persentada dins la chambra granda :

Fontevrault > Candes >Saumur (>Tors)

I a un temps per tot, un per bicicletar, un per minjar, un per s’entornar. Coma aima pas passar doas vetz au mesma endrech, decidí de segre lu bòrd de l’aiga, e per aquò, qu’es fnar veire ente la Viena se gieta dins Leire, sens obludar lu chasteu de Montsoreau o las meijons trogloditas dins Turquant (>fr).

Veiquí lu chamin :

E veiquí l’endrech :

Aquí maitot esperava un quauquares de grand. Bon, fau dire maitot que avecque la chalor, aurosadament que i a un pauc d’aiga d’adjutada dins lu fluvi, autrament, i a ‘na centrala nucleara a Chinon que traparia ben dau mau. Lu dicton ditz « À Chinon, la Vienne perd son nom », mas sens ela, la centrala perdriá sos electrons.

Res de dire sus lu chamin ne’n defòra que per pertir de l’abadia, l’apliqueta fai prener ‘na granda costa e d’un còp, fau virar dins un champ de bigaroelh. De segur, deguet i aver autravetz un chamin, eu es sus la carta, mas, aus jorns d’auei, qu’es un chamin per los asnes… e n’i a un sus ‘na becana.

Jan l’eissabanit mai sa bicicleta tornaran per lu tren. An pro fachs de chamin entau.

VU2019

De la veloruci’ universala, aquò se’n parla dins lu jornau locau, aquí (>fr) mai ‘quí (>fr) ente sei dins lu filme. Ne’n veiquí quauquas fotos, mai la becana d’un de Marselha (que parla pas la linga) :

 

L’an entrant, aquò deuria se passar dins la Normandia.

Daissar Tors per Sent Junian

Desjà per i ‘nar, aguí mau aus januelhs (la resulta d’una meschaënta pratica au trabalh, qu’una paleta me davalet dessus) passat lu km 100. Apres ‘ver fach la colha 3 jorns a bramar per los ciclistes, forcadament, quò ‘nava pas mielh. Visití la ciutat maitot, per eisemple, aquela chapela cuberta de bardeus :

 

Sus una de la fotografia, la violença urbana se balha de veire, mas, qu’es mai aisat de cridar sus los ciclistes !

Autra visita, lu centre de creaci’ comptemporana, mai 5 erpausici’s, tant de colors, d’una escultriça, d’un dessenhator e forçadament, dau Debré.

Adonc, non pas far coma prevut los quauques 200km de Tors per Sent Junian sus ‘na becana, vei-me-quí de copilhar lu chamin ne’n dos. Finalament, farai Tors > Peitius > Lussac-los-Chasteus mai los trens regionaus, daus trens ente i a pas pro de placas per las becanas maugrat las promessas dau governament, maugrat çò que disen los comunicants, quò que disen las « grandas regions ». Dins la gara de Peitius i a mesma pas de rampa per aidar far grimpar los ciclistes d’un cai ad un autre per los eschaliers. Me parletz pas daus ascensors, son per las personas que ne’n an vertadierament besonh. Ne’n mai d’aquò, ‘na becana mai de las sacochas rintra pas dins tots.

Lussac > Sent Junian

Dins l’eideia prumièra, apres aver empruntat l’eurò-velorota 6 — la rota daus fluvis — desirava segre l’EV3 — la rota daus romius — que ne’n faguí un bocin a la prima (>òc-rapieta).

Forcadament, qu’es la pertida realisada per tren qu’eriá la mielh sinhalada. Forcadament, Jan-la-ronha vòu passar per tau endrech e tau endrech.

Au surtir de la gara de Lussac, viguí ben la rota oficiala, mas, mas, mas per mamaisar un pauc, començar de rotlar a la desbuta de l’après mieijorn, qu’es pas çò que vai balhar de l’eime au toriste. Adonc, decidí de segre lu chamin balhat per lu jaspit-aurelha, qu’es de dire, 20km tot drech lu long d’un chamin de permenada. Aquò es confirmat per la carta, tente l’afar, per lu bonur :

RIMG0248

Qu’es dins ‘queu cas que Jan-d’Auvernha se montra una fòrt bona randonosa (>lm). ‘Ribat a l’Isle-Jourdain, vau poder traucar la Viena per lu pont e véncer las paurs de l’enfança que d’aucuns m’aviá fach badar de me forçar a montar tant naut :

 

Traucar sus lu pont qu’es daissar un temps la rota oficiala, per la mielh retrobar a Avalhas Lemosinas, le tornar pardre d’aici Sent German :

Far de la becana quò vai un pauc, 70 km sos lu solelh, quò vai vista beucòp, sei pas coror profesionau per iò endurar. Prene ‘n’ ecorchiera, que monta, per tost ‘ribar chas me.

I a daus chamins un pauc pertot dins lu país, beleu pas tots d’una qualitat pro bona per ne’n far una velorota, e pertant. Viatjar entau qu’es un grand plaser, aquò perserva los cantons, la cultura, se’n obludar que qu’es economique, tant per lu cicliste que per lu canton. Un permenor coma me, qu’aime son pitit confòrt se paia ‘na chambra, emai eu siguesse un minja raiça, fau minjar, beure.

Tant zò dire una vetz de mai, far de la bicicleta qu’es pas estre esportiu, i a pas mestier de se deguisar ne’n coror e far la reclama per daus minja-mardas, i a pas besunh de se drogar o sabe que.