Dau lemosin dins lu pòste

Coma sei après un pauc netiar ‘queu ciberquasernet — aquò será ‘chabat d’aici la fin dau mes de genier — i a daus liams que van estre dostats perque son crebar, e d’autres que van demorar o estre metuts à jorn, coma ‘quò se ditz.

Aüei, la tireta dau pòste de radiò, mai 3 liams :

Lemosin, coma ne’n usar

Par l’escotar fau se levar d’abora los dissabdes, a las set oras manc’ un quart, e metre lu pòste sus Radio-Lemòtges.

Son de las p’itas istòrias que son contadas alentorn d’un mòt o d’un biais de dire, aquò per lu Jean François Vignaud. Tot ‘quò-quí se fai dins las doas lingas boiradas, l’occitan dau Lemosin coma lu francès, sos la fòrma d’un eschange parrier coma autravetz los pairs disián aus goiats.

De mon vejaire es pas pro long, o b’etot, aimariá zò escotar tots los jorns. Es aisat de s’abonar au sistèma de « balada-difuci’ » per l’aisida de Radio-França.

Meitat chen meitat pòrc

Apres vos estre levat lu dissabde, veiquí lu dimenc, a 11 oras ‘questa vetz, e sus Radio-Peiregòrd. Aquí qu’es un pauc mai long, ‘n’ora de temps.

Son dos persentators, lu Joan-Pau Verdier de bana coma lu Nicolas Peuch, mai un convidat, o una, coma per eisemple la Benedicta Bonet aquí dins ‘queu liam. Ne’n defòra d‘aquò, i a de las rubricas comunas a totas las emici’s.

De mon vejaire, qu’es mai d’una vetz un pauc tròp occitano-occitan que fau estre de la gleisa de l’occitanologia per comprener, mas, quò fai res, merces la balada-difuci’, setz pas dins l’obligaci’ de tot escotar. Çò qu’es agradiu, qu’es d’auvir daus autres dialectes.

Un pitit bocin

Tots los darniers ‘mercres dau mes, a 21 oras sus las ondas, quauques temps pus tard per ò descharjar desempui la tiala, i a ‘n’ emici’ sus, e dins, la linga dau païs.

Aquò es fach per los Raymond Latournerie e Jean-Louis Manquas que son pas daus professionaus, de segur mas daus passionats cranes. I a quauquas lonjors de las vetz, mas, las son vista obludadas per lu plaser balhat dins l’escota ; la tropelada pren dau plaser d’estre autorn dau micrò e ‘quò-quí es fòrt plasent d’auvir.

  • Lu liam de Radiò Pac (>fr) per descharjar lu programe.