Tots los asnes de la feira

« Tots los asnes de la feira se semblan pas » e i a dau monde per voler la plaça.

Me’n fote un pauc dau regent, tant iò dire, esmai ‘quò plaguesse pas. Vòle pas contar aquí ma vita per me far planher, iò fase be soventavetz, mas coma ai un certan sense civic, fase~fasiá lu chamin d’aici l’escartador per « votar blanc »…

Ujan, voliá mesma pas me desplaçar talament tròbe tot aquò nonmàs bon per rire. Mas veiquí pas que Senta Sonja de las Estelas me davalet dessus e me balhet mandat quitament sens me damandar res, que coma ‘la anguet far las empletas ela será pas aquí, que sem veisins, que son bureu…

‘Guí beu dire que mon bureu es pas lu mesma que lu seu, ‘na vertat desempuei la nòstra vita comuna, ’guí beu dire que qu’es lu varruelh de St Lionard que ’la manhet e non pas quò meu, afe… aguí, aguí aguí que res li faguet, sei dotat d’un mandat e adonc me deve l’onorar, de son caire ad ela, autrament ‘n’armada de sautareu vai tot minjar dins lu canton.

Sei feble, i pòde res, qu’es entau. Sei pas fòrt coma ò son d’autres. Pòde vence ‘na veitura, un còp, doas vetz, pòde lutar sos la plueia, la tempesta, pòde ne’n far e mai que tot ne’n contar, coma los autres, mas aquí, sei sarrat.

D’enquera ‘na vetz conte tot aquò per desparlar un pauc que deman ‘mercres 19 d’abriu ‘na peira de l’espaci vai passar pas luenh de la Terra, adonc desparlar per ‘catar ma paur 😉 perque deman sei eisaminar au trabalh e que faguetem res 3 ans de temps ;-( desparlar un pauc per lu plaser de montrar lu darnier filme que la goiata m’envoiet per me far creire que lu païs eriá perdut :

Sei pas dins la capacitat de iò virar, mas lu tipe es fòrt bon, l’aiá descubert las atacas de París passadas. Aime ben ‘questa fòrma de connarias.

Publicités