Nihil novi sub sole – Res de nuòu sos lu solelh

Un torna-z-i avant d’anar dins lu cabanon chosir luquau o laquala vai nos toschar, un torna-z-i sos la fòrma d’un pitit libre dins las doas lingas latina e francèsa, que desboira daus bocins de teistes latins escrits n’i a quauques 2000 ans.

(publiat una prumiera vetz ne’n 2011)

Es un libre que vodriá be veire legir per :

— las tres vielhas a la mediatèca que bargassan totjorn sus la fin de la França, a causa dau sòu veisin de l’una. Pensatz, un grec, un grec maridat mesma a una anglesa, veiquí quò que manha las vielhas de 70 ans passats, lu veisin grec.

  • Sem plus chas nos.

— la trinitat d’alcolics dau PMU que s’esmangonhavan sus la votacion dau pertit de la gleisa societalista. Pensatz, lu PS fai paiar per votar, mas lu programe, ent’eu es conhat lu programe.

  • Ben parlar contra raubar dins la caissa
  • volontat e rivalitat
  • poder e profiech.

— los controlors de la SNCF qu’an pas paur dau cancer ‘trapat de fumar sus los trapadors emai ‘quò siguesse bandit, pensatz, un cancer, qu’es-quò faça a la França apeurada per l’insecuritat. V-òc-es la França a paur, ‘la cranh de se far plantar un coteu dins l’eisercici de son trabalh.

  • Violença chas los vilauds.

— los professors despressius que troban tots los ans un quauquaren per romar.

  • Violença contra los ensenhairs.

— los pairs daus Kevin o Jennifer, perdon, Jan-Bestia o Maria-la-necita que saban mielhs que los professors desprimats coma fau far, que ilhs d’alhor, per se far aimar daus monstres, ‘chaptan de las colhonsolas per jugar, daus Ma©-Mardas, daus porta-ondas o sabe que.

  • Contra la metoda globala.

— los vielhs cobilhs que restan tota la jornada lu cuòu pausat sus un banc.

  • Qu’eriá mielhs avant.

— los jòunes que ‘restan jamai de fure pertot non pas se sietar sus un banc e prener lu temp.

  • Dau temp per se.

Coma sei mas un esmangonhator de prumiera, aquò se vei, vau ‘chabar ‘queu bilheton per dire que la legida dau libre fai relativisar lu monde dins luquau vivam, màs, aquò deu pas ostar a degun la soá capacitat d’indinhacion quante fau, tot de mesma.

9782266160780

« Nihil novi sub sole », revirada dau latin per Anne Quesemand e Juliette Le Maoust

Publicités