Oncḁ̐làu – 12

Oncḁ̐làu – 12

« Ai pas l’enveja de ne’n restar ‘quí ! Dijatz me que lu responsable es un de la colonia oïana veisina de l’astrò-pòrt e vos fase ‘restar còp-sec per incitacion a l’òdi e complicitat per tentativa de murtre. Aurai p’una dificultat a la legida dau vòstre implant neuronau de trobar de las pròvas !

— Non comandor, setz dins l’error, sauv vòstre respiech. Segur que qu’es un daus nòstres que faguet petar vòstre elitroptère, mas sei membre dau PET, e lu pertit de la marechala Nȅplȅ i es grán per res. Pòde l’acertar.

— Me temptetz pas !

— Sei elegit au conselh continentau, ai de las responsabi…

— Ne’n fau mai per me treblar. Vòs coma vòstre besson dau FUTIL atz interest de colaborar coma l’inspectritz e son adjunt.

— Qu’es la posicion de l’Union que balhetz aquí ?

— Es quò de las menaças ?

— Non pas contragardar ‘quelas punaijas d’oïans, preparatz vòstras valisas que lu temps de la terra dins l’UE es comptat.

— Ai dins res de temps tres cent de vos ans, estranjament pòde pas comptar parrier coma v’autres. Sei pas talhat per las certitudas. E coma veiquí los de la poliça umana au servici de l’Union, vos balhe l’ordre de los segre. »

Tòst dich, tòst fach, lu cibòrg trapet lu repersentant politique e lu menet defòra.

Sòu aura, davant la veirina que fai faça a la plaça granda, voida dau monde aura, Eliseu se perpensava avant de se branchar coma lu veisseu mair de l’Union lu temps d’una conferença ologramica. per far lu punt mai son esquipa, laquala fasiá los rapòrts apres per los regents dau Conselh de l’Union.

« Quò fai de pus en pus chaud sus la terra, dijatz nos ?

— Crese pas que quò fai bon far de l’umor ! Am res de res dins l’enquesta.

— Perdonatz me. Au subgier de l’elitroptère, an los films memoriò-remaniques que son a l’analisa. Me songe que qu’eriá lu simbòu de l’Union qu’eriá visat, pas lu repersentant ne’n se-mesma, mas, balheten l’ordre per l’Elisa e l’Ilarí de demorar coma v’autre d’aici qu’arribet a la costa est de la Nordameria. Sabem jamai.

— Las analisas satelitairas etericas an vera’iment res balhadas ? Mai que tot sus coma ‘quela bomba poguet se trobar alaï.

— Non, la technologia pòt pas tot non pus. De que que ne’n pensa vòstre amic lu moleculariste, o lu jornaliste ?

— Aimat es fideu a la parola balhada, tant coma Lodeva, migretz pas per ilhs, d’alhors son dins lu bureu. Atz de las informacions sus lu piratatge de son aurelheta electonica. Qu’es pas tant que son avatar rond nos geina mas, qu’es pas parrier. Zopsi es un jornaliste en luquau ai fisença. Li ai desjà damandat de tenir sa linga mai d’una vetz sus d’autre afar. Qu’es mesma se que perpauset d’anar charchar dau costat de l’Euròpa, au despòt ente deviá anar la Celestina, dins l‘ancianna Finlanda.

— A la vuda de la meteorologia pervuda per la setmana, ‘netz dever prener un aërocròss d’aici Nuòu-York, puei lu bedeu sos-marin que vos menará au pòrt sos aiga d’Esgolesme. Passat Esgolesme, surtiretz de l’aiga dins las islas lemosinas, un policròss vos esperará. Coma lu bloquier de la terra vai cuar las comunicacions, vos envoia de las donadas per lu pòrt de Nuòu-York.

— Marces. »

Lu negre de la nuech davala desjà que los repersentants enquestors ‘navan ‘guts que pauc de temps per ilhs. damandeten de poder passar la nuech dins la meijon comuna, e avant ‘quò de poder i minjar un quauquares.

Lu jornaliste tornet a ‘queu momint, per balhar las darnieras informacions qu’eu aviá pogut aver d’aquí-d’alaï. Semblariá que qu’es un dau PET qu’aviá fach sautar l’elitroptère de l’Union, nonmàs perque qu’eriá un besilh de l’Union. De segur, lu pertit de la marechala cridava au complòt farjat per portar tòrt a son pertit jurt’avant las eleccions e per ‘catar la mesa ne’n esclavatge de l’umanitat de per los de l’Union. Lu rapietausor faguet ‘na desbuta de bilhet per la meteò mas los servitors ‘ribavan coma lu disnar, e los autres li digueten qu’ilhs sabian.

Lu lendeman, un veïcula de l’Union ‘ribet d’abora per charchar l’esquipa.

Las dietz oras dau voiatge se passeten sens grand mau en defòra de la plueia. Màs, qu’eriá la sason d’Iruvaa, la sason doça per causa de sos 25°C. Lu corant maritime dau Gulf-Stream aviá esvoluat dins son tragier. Las annadas ente eu montava pas prò naut, qu’eriá de la plueia, de la plueia e dau vent per ‘quela pertida dau monde. En faça, per l’Euròpa, afe, l’archipèle europèen, ‘quò voliá dire ‘na sason un pauc pus freda. Qu’eu montesse e la nevia davalada quitament sus tota la Nordamerica. De segur lu bloquier portejava de la chalor, mas se protejar d’un costat, qu’eriá desboirar autra chausa alaï. Desempuei un cent d’annadas, las chausas s’erian asuausadas, mas los umans cranhavan que la montada de las aigas tornessen prener.

Lu climat eriá d’un aplomb precari d’autant mai que per çò qu’es de la surfaça, los umans, las epidemias passadas aprengueten de far coma la plueia, lu vent e lu solelh, mas dins las mars, la temperaturas ‘vián totjorn pas baissadas, au contrarí.

Lu temps de las crisas, los umans s’erián adaptats, son fòrts per aquò. Los budeus maritimes ne’n erián un eisemple, mas, fauguet los adaptar, de las vetz los doblar que los corants dins la mar erian tant grands que los bedeus devenian dangierós. Ses oblidar que per l’Euròpa, i aguet un prumier pòrt de farjat sus las roinas de Bordeu. Mas, coma las montadas de las aigas, fauguet chamjar lu terminau per Esgolesme, que Esgolesme maitot fuguet quitament sos l’aiga. Afe, aquí, los de la terra damandaten a l’Union de l’aida e ‘na bula fuguet bastida per gardar la vila e lu pòrt. La ciutat passa beleu dos mes sos l’aiga, servada per sa bula.

Lu budeu fuguet bastit un pauc coma los trens sos-terrans d’autravetz. Un long fiu de ciment, chavat, eriá pausar au fond de l’aiga, e daus veisseus erián pilotats dedins. Lu budeu que traucava l’atlantique eriá l’un dau mai vielh sus terra.

De segur, los non-umans avián menats coma ilhs sus terra de las besonhas pauc energivòras, coma los « forças-de-la-natura-cròss », que ‘quò siguesse los idròs per los cantons aigats, los aëròs o los terràs per las planas, o d’enquera los policròss per anar un pauc pertot. De las vetz, segond lurs utilisacions qu’ilhs « cròss » povian recebre un chareton, un raijon portor o autres.

Una ostessa umana, de bana coma una inteligença artificiala de la poliça, saludet l’esquipada davant la gara avant de prener lu budeu. L’enregistrament fuguet nonmas ‘na formalitat emai los representants de l’Union ‘vián pas de passa-drech presentament. Los esvinaments de Devil’s Tower erián sus mai d’un visatge, e ne’n mai de l’estat d’urgença, a la vuda dau comandor, la gent se son pas sentits assegurar de viatjar dins lu mesma veisseu.

Un toarg davalet dins son fautuelh autorportat. Eu saludet lu comandor davant tot lu monde e se persentet coma lu pilòte dau veisseu. Un second toarg arribet, saluet s’etot la delegacion, la gent amassat. Los dos se dirigeten vers lu colidor que menava au veisseu. L’ostessa anoncet que lu veisseu seriá apretat dins quauquas minutas, que per securitat, los afars, las valisas, ‘navan viatjar separament dau monde. Ela tornet dire las consinhas de securitat, que au despart fau boclar las porteccions plasmaïcas, qu’i aviá tres oras de viatge puei a l’arribada, de noveu, faliá boclar las ceinturas.

-!-

~ 1340 mòts per lu chapitre 12

Publicités