Oncḁ̐làu – 9

La traduction de la prophétie Oncḁ̐làu –§8 – est disponible ici (>fr) et la légende des pierres qui poussent, sur le même jouèb icitte (>fr)

Oncḁ̐làu – 9

« Adonc ?

— Podem pas nos saber, comandor.

— E ?

— Ilarí passet la zona aux raijons T, lu sòu biais per decubrir çò que i a dins la matièra. Quò balhet res de res. La bomba magnetica faguet dau bon trabalh per entau dire.

— Res de mai que lu BSU ?

— Non, res de mai. Faguetem de bana las analisas de probabilitat que lu carburant boirat coma los fragments amplifiguesse l’aboliment dau pòrt, mas aquò se ten pas, que la naveta n’aviá pas prò de carburant a la sega d’un auvari. Ela deviá esser menada per daus dirigeables d’aici l’archipel européen, per una annada de maintenença.

— De mai lu quite auvari sus lu module eriá contengut dins la naveta, segond las proceduras.

— E costat personau, pas de malaut ?

— Lu personau de bòrd eriá composat de terrians e d’oïans coma iò fan los umans despuei d’annadas per afortir la patz. Que daus estats de servici de bona qualitat.

— Per lu personau dau pòrt, qu’es un pauc mai complicat mas la brigada de securitat analisa los dorsiers.

— N’autres dos, coma los de la BSU sonjan que qu’es un element eisterior que venguet far un atentat suicidi.

— Quala es la probabilitat que ‘quò siguesse un oïan ?

— Am fach de la projeccion. Los oïans an la sciença per construre ‘na tala bomba, tant coma los umans. Trobar de que la farjar es malaisat mas pas impossible sus terra, los fragments chauds son aisat de far e costan quitament res. Una persona fòrt organisada pòt amassar los bocins ne’n sieis mes e los assemblar ne’n quinze jorns. Sonjam, coma lu BSU, que la bomba fuguet pas ‘menada desempuei la Celestina ; l’entreprise ‘nava pas sens riscas, que la bomba eisploguesse sus Luna² e los desgats aurián estats fòrt mai importants. »

La discussion se passava dins lu salon de l’elitroptère e los escrans montravan un grafique per dessus ‘n’autre. L’enquesta semblava dever estre longa.

Un veiseu encontret ‘na bombe au momint d’aterrir, quauques temps avant de las eleccions bassez importantas per la terra. E los que van pas mancar de ne’n tirar profiech son los politiques isolacionistes, que l’Union es lu diable. Eliseu eriá un pauc perdut dins sas pensadas.

« E la subrevivanta ?

— Ela se trobava ne’n còa de naveta, beleu sola dins son module. Pensem que ‘la fuguet protegiada per son pilòt de tracts…

— Nȅplȅ ?

— Non, Laŋ Mechoŋ. Militança « a l’anciana ». Am sonjats a la desbuta que ‘la auriá pogut estre la terrorista, mas non. Mai que tot que los mechonistes son daus normalisators, una sola linga sus la terra per eisemple, daus centralisator, tot deu estre descidat per Nuòu-Delhi, ilhs son pauc duberts a las noveutats. Au sugier daus oïans, son contra las colonias un pauc pertot sus terra, los verián be màs dins la sudamerica, sens la lur balhat, mas dins un sòu endrech ente serian liures a condicions d’obeïr aus normas de la terra.

— L’Union…

— Perdonatz me comandor, mas son per far marchar l’UE coma ilhs volan, autradament, son per ne’n surtir. Per ne’n ‘chabar mai lu FUTIL…

— Autant an de las perpausicions que podetz jutjar dangeriosas, mas son pas daus criminaus, diguet ‘na votz aiguda darrier la tropala, la votz dau Zopsi, lu jornaliste. Fajatz me eiscusa. La pòrta eriá pas barrada.

— Vaque vielh crocodile de la terra !

— Sabe pas se deve dire “tu” o “vos”, aura que tu ses “comandor especiau”.

— Atz de las chausas d’adjutar ? damandet Aimat.

— Non, sei dau mesma eivís que l’ispectritz e lu vòstre cibòrg. Los mechonistes son pas los pus finaus de l’umanitat mas d’aici ne’n far daus terroristes…

— Atz ‘n’ipotesa ? damandet l’avatar rond de la xenològa, non pas dire de las chausas sus los umans.

— Vau estre franc coma v’autres, sei aquí desempuei la desbuta de vòstra parladura. Lu fach que la Celestina deviá anar dins l’anciana euròpa es de crosar, sabe pas perque. Autrament, e zò metrai pas dins lu jornau se ò damandatz, ai doas questions de pausar “au comandor” que la poliça es pas dins la capacitat de me balhar de responsa. D’en prumier, perque i aviá pas de paraplachutes a la naveta, o un bloquier de porteccion, de’n second, perque qu’eu mòt Oncḁ̐làu apareis aëui, sus un daus astrò-pòrts los mai frequentats de la planeta ? »

Lu jornaliste eriá aura au mitan de la sala. Los autres lu gaitavan coma se eu aviá pas sa plaça aquí, mas lu comandor semblava lu coneitre, aquò semblava valer totas las cartas de premsa.

La responsa a la prumiera question eriá aisada. Quante una planeta arribava dins l’union, los transferts e los eschamges de technologia se fasian segond un calendier acceptat d’un costat coma de l’autre.

Los de la terra avián coma prioritat de purifiar l’atmosfera, netoiar las mars, tornar far de la terra una planeta per viure, ilhs coma los ‘limauds, maugrat los desrenjaments dau climat, malgrat las polucions radiò-activas per endrech. I aviá ‘gudas tant de chausas de damandar aus eistraterrestres…

« Vau te balhar la responsa per Oncḁ̐làu, que vene de ne’n aprener la legenda. Me songe que los mòts erián aquí desempui longtemps e que la gent ‘vian obludat. La raïada lòrs de la petada faguet resurtir las letras, aures. Crese pas, vertadierament pas, que ‘quò siguesse una revendicacion. Pòdes iò marcar dins ton jornau. »

Lu jornaliste sabiá que aura eu comptava dins l’esquipada per menar l’enquesta.

Eu auriá ‘gut d’enquera mila question de pausar, mas sus un daus escrans, la faça de la marechala se fasiá veire e lu comandor damandet au Arti de montar lu son.

Desempuei la ciutat sureslevada d’Asunción, La marechala Nȅplȅ esperava per montar sus l’estrada. Ela aviá perfeitament lu sens d’una amassada e sabiá sentir l’esmai crut que se’n eschapava. Quante las clapetadas torneten prener, quante las votz torneten cridar « Marechala ! Marechala ! », ‘la sautet sus l’estrada, cap au bòrd, los braçs ‘nauts levats, los punts barrats, un sosrire sus las pòtas.

« Marces ! Respondet ela, faça aus òmors de la fola. Marces, mos amics, marces. »

E l’ovacion tornet prener, doas vetz mai forta, puei, cuet d’un còp, per laissar la marechala prener la paròla.

« Vene de Nuòu-Delhi, que de la gent me digueten alaï que mos electors serián un problema, un problema per la securitat de la terra.

— Boooooooo, faguet la fola.

— Ai damandat a ‘quela gent se pensián un jorn far quauquares per los problemas vertadier de la terra, vòle dire los v’autres…

Las clapetadas torneten prener una vetz de mai

— … Mas, los mesma avián coma antifònia “UE – UE – UE” e los privilegis que balha aquela “union” quante trabalhatz per ela. Que segur, trabalhar per v’autres fai pas miranda… Qu’es be la rason per laquala “ilhs” balheten la terra ad un “comandor”, un daus lurs, mai daus poders especiaus per vos dominar. Mas v’autres, v’autres setz l’umanitat, e per l’aura setz l’autoritat de la terra, atz pas chausit ‘queu “comandor”. Mas v’autres, v’autres setz la democratia, setz lu pòple poderós, setz lu poder, non pas coma ‘quela “union” tant eslunhada de las vòstras perocupacions. La securitat de la terra, la vòstra securitat, la prioritat de las prioritats, es sos los ordres dau “comandor”. La prumiera decision dau “nòstre comandor” fuguet de desarmet la terra, mesma, eu faguet venir daus veisseus eistraterrestres, armats ilhs, e degun songe que ‘quò es pas per la nòstra securita, degun sonjarai aquò, non…

Un rire montet de la fola

— E quante un veisseu eisplosa, coma se desfendre aura ? L’UE nos envoiet dins lu cuòu de sac qu’ela farjet especialament per nos redusir… que sem pertant aquí chas nos, iò dise, la terra aus terrians !

Las clapetadas torneten prener una vetz de mai

— … Mas, mas am daus drechs de far valer. ‘Tencion, pas lu drech d’anar purar aupres d’una de la lurs institucionr, non. Am lu dever de ne pas segre çò que vai descidar lu “comandor”. Beleu zò sabetz pas mas, eu vòu contrarotlar lu bloquier de la terra, beleu per nos dedusir a res, nos far cramar. Eu eispliquet mesma que los veisseus armats erián per assegurar la securitat daus oïans, contra las nòstras violenças, mas quantben de mesuras an estadas prengudas per vòstra securitat ?

Las clapetadas torneten prener una vetz de mai

— Los oïans an ‘na planeta, saugueten nos ne’n chaçar, qu’ilhs i restan. Quante ‘quela “union” ditz estre nostra amija, mas, daus amics entau, podem far sens. Iò dise, n’autres devem surtir de l’UE, per nos aidar dins la galaxia, i a d’autras amassadas de planeta, la Guilda Verta, l’Empirí Fred… mas per l’ora, sem beleu en dangier. Degun daus vòstres a dreit d’usar d’una arma, degun pòt desfendre sa meijon e sa familha d’una ataca, e, malaürosadament, am vut que aquò ‘riba vista. Per l’ora, i a gaire que lu PET per estre dau vòstre costat, per prener la desfensa de la terra. N’autres nos laissarem pas virar de la terra per la laissar a d’autres, per se laissar remplaçar. Aquí, dins la Sudamerica, cride a la resistança contra l’Union e son comandor. Cride a se mesfiar de los que disen poder far coma los oïans au nom d’una profecia, parle aquí de la creiança dins Oncḁ̐làu, que los oïans serián coma n’autres. Lu comandor es dins la pertida nòrd dau continent. Sabem pas d’enquera çò qu’eu poriá apondre ad una enquesta menada per la fòrma, que los que fagueten l’atentat son coneguts e protegiar. Lu comandor repersenta un sistemi, pas lu poder de la democratia, que la democratia qu’es vos, lu pòple qu’es vos. Setz lu pòple, setz la terra. »

L’eimatge montrava aura la fola que chantava, cridava los eslogans dau PET.

Dins lu salon de l’elitroptère, sòu lu silenci renhava.

-!-

~ 1690 mòts per lu chapitre 9

Publicités