Oncḁ̐làu – 7

Oncḁ̐làu – 7

Passat la persentacion a la premsa que de talas fonccions especialas son quitament ‘na prumiera per un diplomate de l’Union Estelada sus ‘na planeta que fai pertida de la confedaracion, lu lendeman se passet d’encontrar los regents de las diferentas chambras representativas terriannas.

La prumiera visita fuguet per la Chancelaria territoriala de l’Umanitat Terrunidena. Que son poder siguesse nonmàs representatiu contava gaire faça au besonh de fisança per çò que daus umans fan d’afis de lurs regents, tot aquò sens obludar que jurtament, la sason d’Iruvaa de 3017 ‘nava estre ‘na perioda electorala per chausir lu noveu, o b’etot la novela, chap de l’eideialogia de la terra. Lu biais de far eriá d’assegurat los repersentants actuaus.

La seconda visita siguet per lu Collegi Uniterrian, la chambra ente son descidadas las leis. Eu es composat en granda pertida de scientifiques dins mants domenis que quò siguesse de la sociologia, de l’antropologia, de la geografia, lu domeni medicau o daus uns còps de las personas purament techniciana. Lu collegi pòt comprener mesma daus jutjes. Tot ‘queu monde es chausit e controlat per los parlaments continentaus. Son chausits lu temps d’un mandat o d’una enquesta. Las leis perpausadas per ‘queu collegi son per la sega votadas per los parlaments continentauslos set continents son estats units dins un confederalisme forçat lu temps de la corpocratia, lu sistemi politique que regentava lu monde segond los sòus interests daus grands grops industriaus. La corpocratia prenguet la plaça de l’homecratia dins lu prumier quart dau sègle XXI. o cantonauspassat la periòda de montada de las aigas, i aguet de las islas que sauteten e damandeten ‘na fòrma d’autonomia a la desbuta dau movament, mai d’una vetz, per se tornar atalar a l’ancian continent ‘na vetz la situacion estabilisada, mas, damandeten de servar de las espeficitats politicas..

Puei ‘quò fuguet lu torn de las diferentas chambras universalas, la de la justiça, la de l’environament, la de la poliça o d’enquera la chambra economica interstelaira.

Eliseu, Lodeva e Aimat ne’n povian pus de totas aquelas visitas, mas l’importança de lur dever passava avant lur persona.

Lu ser, lu canton diplomatique se trobet barrat per causa d’un’alerta. Se trobeten un momint en defòra de ‘queu-quí e descideten de far un punt autorn d’un disnar dins la pertida nauta de la ciutat de Nuòu-Delhi, que la xenològa coneissia un endrech.De fach, lu restaurant eriá bastit dins l’un de ‘quilhs estatges de sureslevacion que s’espandisseten dins lu monde entier los prumier temps de la montada de las aigas.

Las vilas recebian mai de monde de lòtjar que povian ò far, la sureslevacion daus bastiments fuguet ‘na bona trobalha. Mai que tot que ‘quelas sureslevacions servigueten de cuòu de pitau quante las terras gialadas daisseten s’eschapar los gaz mortaus e que tant de monde trapeten daus maus que corren.

Passat lu temps de las malàudias, los estatges de sureslevacion fugueten tornats occupats per daus vargiers per minjar o per se permenar, quauques estatges gardeten l’utilitat de refutge climatique reversible, per far en cas de tempesta, en cas de chalors importantas e dins las situacions d’urgenças, d’autres fugueten utilisats per los lesers.Dins lu restaurant, lu servor damandet aus eistraterrestres se desiravan sus los carreus e dins la sola veire generar un environament propche de la realitat de la lur planeta ; los dos digueten que non.

Avant lu disnar, un memdre de la Guilda desjà ataulat venguet veire se i aviá mestier d’aidar. Eu eispliquet maitot estre blocat per quauques temps que las instanças dau contraròtle dau climat ‘vian descidat de laschar sus lu continent de las nivoladas grandas de nanòparticulas limitadas per netoiar l’atmosfera. Per lu triò ‘quò voliá dire que faliá pas comptar sus los anneus de teleportacion per anar de Nuòu-Delhi d’aici lu continent nordamerican.

« Vos faudra un ustilhs mens gormand ne’n energia ! diguet un daus secretaris persents.

— Prendrem un elitroptère. »

Lodeve, la xenològa aprofeichet de l’avant disnar per eispliquet que ‘la seriá pas dau viatge, afe pas fisicament perque ‘la s’eriá rendut-compte que son aurelheta electonica interna aviá estada piratada. Emai ‘la sonjava que qu’eriá beleu sens liam coma l’evinament, ‘la descidet de daissar ‘questa charga ad un de sos avatars ologramiques. ‘Queu-quí se persentará sos la fòrma d’una còca volanta. Qu’eriá un daus droïdes metuts au punt per los umans sòus apres ‘ver beneficiats de las technologias eistra-terrestras ; la representanta de la terra ne’n eriá un pauc fiar de iò far saber. Ela se sentisset un pauc ne’n retard quante Aimat li parlet de las technonologias usadas dins quauques cuenhs de la galaxia coma lu doble eterique de la persona o las conferanças vibromassadoiras.

‘Queu disnar eriá l’enchaison de parlar de quauques punts que lu comandor voliá arrestar ‘vant de pertir sus l’autre continent e mai que tot de balhar de las precicions sus sas doas demandas a las chambras universalas, doas damandas que ’navan pas de dreich, esmai las siguessen limitadas au temps de l’enquesta.

La prumiera eriá la desactivacion de totas las armas plasmaïcas dau continent nordamerican, tant per las personas individualas que per las colectivitats, sauv per las fòrças de l’ordre a la condicion sine qua non que los comandaments siguessen menats de bana coma una de las espeças eistraterrestras de l’Union. Eu comprenia be que quò ‘nava estre mau interpretat per los planetaristes, los UE-foristes e los complotistes, aquò d’autant mai que eu tornet dire que las fòrças de l’union se tenian prestas a remplaçar las garnisons enchiprosas, e qu’un oïan siguesse tuat o quitament matrassar, eu auriá p’un barbinhatge de prener directament las comandas. Coma gatge de sas bonas intencions, eu pauset dins la balança sa reputacion e lu liam de sa familha coma la terra.

La seconda granda chausa de demandada ‘via estada que los estrangiers au canton de l’evinament siguessen tots, umans o pas, esquipats d’un tòrque o d’un braçalet cimatique, per cas qu’ilhs desiravan anar dins la zona per quauquas rasons que quò siguesse. Los tòrques erián lu melhors sistemi de contraròtle de çò que se ditz o se fai per una persona, e los tòrques son un bon ustilh per empeschar de portar tòrt.

Las sòlas chausas qu’eu cedet fugueten a la chambra policiera la possibilitat de gardar los pistolets aniliators. Una descharga d’aquela aisida pòt esbolhar lu sistemi nervós d’una persona per ‘n’ora, sens parlar daus divers droïdes ; aquò perque las fòrças de l’ordre cranhavan daus movaments violents de la part daus dos movaments que menavan la campanha electorala. lu comandor cedet a la chambra environamentala sus lu biais de menar lu bloquier ; eu lur prometet mesma l’aida daus technicians de l’UE per l’ameliorar.

Lu disnar se passet bassez ben, que, segur, lu monde dins lu restaurant los gaitava tot tres, mai la gent autorn de parpalhonar autorn d’ilhs tres. Las responsas arribaten coma lu sucrat e de bana coma la levada de l’alerta. Las diferentas chambras s’acordavan per balhar los poders especiaus au comandor, sur las armas e los tòrques. ‘Las ‘vian pausat màs una sòla contrepertida : qu’eu envoiguesse un compte-rendut sur la menada de l’enquesta, tots los jorns.

Passat la darniera inspeccion de las forças de l’ordre dins lu cadre de l’alerta, la xenològa desiret pertir viste per preparar son avatar, que per los umans se desdoblar eriá pas tant cepte que per los molecularistes, per eisemple. Aquò fuguet l’enchaison per ‘queu darnier de dire ‘na fòrma d’au reveire a sa fòrma bessona. Entau ‘nava la vita daus molecularistes, podian estre sos mantas fòrmas un temps donnat, puei sos una autra, se gropar o pas, e entau fasent, dins tota la galaxia. ‘Queu mòde de reproduccion fasiá d’ilhs quitament daus imortaus, de considerar que las pertas erián negligeablas quante se dispersavan. Coma ilhs avian pas vertadierament de planeta, avian pas vouguts estre dins ‘na sola organisacion planetara, adonc, daus uns trabalhavan coma l’Union Estelada, d’autres coma l’Empire Fred e d’autres per la Guilda Verda.

La plueia ‘chabada, lu comandor e l’inspector gaitaten pertir la xenològa que la portièra dau terracròss blindat se barrava sus lu brilhant de sa combinason aquasemsibla. Eliseu desiret rintrar d’a pè, qu’una permenada es bona per se carcular. L’Aimat ‘net coma se, sens escòrta.

Las plueias de la jornada se fasián d’enquera sentir dins las ruas de la vila. Fau dire que lu termometre baissava gairement jamai per delai los 18°C la nuech. Ad aquela ora dau ser, los lóors de droïds paraplueijants avian daissat la plaça aus amorós e per los servir, i aviá daus vendors de flors, segur per esperar grapilhar quauques europias mai-que-tot. Sus las parets, totjorn los infò-lutz, totjorn lu mesma bramadís dau uns daus autres sur çò que faliá far, çò qu’auria degut estre fach, pas jamai de vertadieras solucions.

Coma la presa de fonccion ‘viá estada filmada, la gent dins la rua avieisavan de las vetz lu comandor, lu tornavan coneitre per còp-sec tornar la testa e marmusar. Lu comandor aviá pas damandar de garda personala, que, mesma bandit per las leis de l’Union, se reserviá lu drech d’usar de sos poders psioniques per modelar l’espaci autorn de se, per cas qu’eu ne’n ‘guesse ‘gut mestier. Eu sentiá ben las pensadas dau gent, las lurs crentas.

La majoritat daus umans eriá demorat cranhosa daus eistraterrestres, mesma desempuei los cinc cents ans de contacte. Pertant, segond los protocolis espaciaus, tant que quò se pòt, un, o una, eistraterrestra deu far son possible per semblar las espeças ente eu se troba. Es entau per eisemple que los molecularistes avián un vestit quantique per progietar ‘na fòrma umanoïda aupres daus umans, entau fasent, erián pas espaurits. Per los de Tresid, qu’eriá mens aisat. Fasián dos metres de naut, coma los umans, mas, avián pas esvoluats coma ilhs, erián tots magres coma de las marionetas de buesc daus temps ancians. Las projeccions quanticas marchavan pas sus de las tant p’itas surfaças. ‘Questas crentas erián degudas aus sègles d’asservissament a las creianças religiòsas en pauc pertot sus terra, creianças qu’avian imprimats dins l’eime daus umans qu’ilhs erián las creaturas las mai esvoluadas dau ‘nivers, çò qu’aviá ralentit la compreneson daus umans sus las lur responsabilitats envèrs la planeta e ‘queu mesma univers. ‘Quelas crentas concernavan beleu lu beleu miliard d’uman restat sus terra, que lur trabalh essenciau consistava de’n estre ‘na fòrma de doctor. Per los dietz milions d’uman sus Luna² e lu milion esparsilhat dins las colonias de l’Union, la question se pausava pas.

Lu comandor e l’inspector passeten d’una passarela l’autra dins la vila nauta, d’aici lu grand colidor de veire instalat per dessus las vielhas ruas de Delhi, aüei reservadas aus droïdes de servici de la vila. Qu’eriá estat ‘na volontat de l’Uniterra de jamai catar çò qu’aviá estat la vita « d’avant » l’arribada daus eistraterrestres e dau grand bon que s’enseguet, mai que tot que la vila eriá aura considerada coma la capitala de la terra.

Lu colidor passat pogueten rintrar dins lu canton diplomatique es daissat darrier ilhs la jornada e las corbetas per esperar prener suau-suau l’elitroptère de comandament lu lendeman.

-!-

~ 1940 mòts per lu chapitre 7

Publicités