Oncḁ̐làu – 2

Apres ‘queu-d’aquí de NNWM, atz lu NaNo de la Mela de legir (>òc)

Oncḁ̐làu – 2

Desempuei la granda sala de comanda, qua’iment vida d’operator per aura, Lania, la capitana umana, menava las operacions per la Celestina ’ribesse ne’n bon ordre a l’astrò-pòort sus terra.

Una ora per far los darniers punts mai son equipatge que ‘nava pas tardar de se desvelhar chascun apres ‘ver fach son torn de garda lu temps de la vint oras de viatge.

Adonc, Lania damandava un darnier bilanç a l’inteligença artificiala de bòrd, l’Astri. Lu plasmoïde de servici, s’eisecutet còp-sec. N’en mai dau bilanç, ‘la envoiet un androïde prener las mesuras dins un daus modules energetiques que la lumira e l’alerta venian de se desclenchar. Qu’es una de sa fonccion a ela de velha sus la mecanica, l’informacion dau veisseu.

Lania ne’n aprofeichet per li damandar de passar ne’n contraròtle visuau sus l’escran eterique principau, que, emai quò siguesse pas greu per passar l’atmofera mai un module desboirat, ela voliá pas recebrer d’amenda au pòrt per un afar de polucion. La poliça de l’environament eriá pas la mai risenta dau monde.

Son segond, lu luòctenent Bolsène, un oïan, la rejunhet. Son rite esportiu dau mandin, a se, eriá de far de las lonjors dins lu veisseu, per gardar la fòrma. Ne’n mesma temps, eu ‘nava totjorn gaitar l’estat dins los modules terrians e eistra-terrians.

« Cinc per mila au comptor !
— Un daus taus lu pus feble dins lu badatge espaciau sus ‘queu chamin.
— Son luenh los temps per los umans d’estre medalhats a cinquanta per cent.
— Luòctenent, una tala plasantaria es pas dins l’ordre de la diploma…
— Astri, quò diguet la capitana, qu’es ‘na plasantaria, nonmàs ‘na plasantaria de vestiari, e per mon peron, aürosa d’aver un tala taus. Envoia donc dos androïdes per aidar lo monde de se levar e se netiar.
— Capitana, sem intrats dins lu sòrne de la terra, lancet Astrid, lu bloquier es a l’apogeu dau nòstre veisseu. Me fau ‘quò engatjar la procedura per aterrir.
— Prepara mas sens res engatjar. »

Lania gaitet la pervisions meteorologicas generalas per la terra.

Las islas d’Euròpa ‘navan coneisser de las plueias violentas per una desbuta de sason. La pertida continentala de l’Union Orientala ne’n erian a la fin d’una tempesta, la darniera de l’annada, la pertida situada le long de la costa dau Pacifique eriá sos lu solelh. La Fricunida e l’Oceania erián dins las normalas sasonieras, qu’es de dire un pitit 19°C, lu vent ‘via bufet tota la nuech. Per las Americas, las plueias ‘navan ‘restar d’aici la fin de mandinada per daissar plaça ad un vent de 30km/h.

Las tres autras personas d’equipatge ‘chabeten per arribar dau module personau. La medecina portava una beuvada per se desendurmir.

« Ai pas enveia d’esperar estre sus terra per desjunar.
— L’un dins l’autre, ‘na beuvada o dau minjar de sintesi, sabe pas luquau es lu melhors. I a per te d’estre la medecina de bòrd, que tombesses malaudia…
— Ai las endermas, qu’es entau ! E tant que sei pas desvelhada completament…
— Doctor, diguet Astri, ‘na vetz ‘chabat, legiretz lu bilanç balhat per los tòrques cimatiques. I a dos viatjors, los de la planeta Toarg, que son portors de l’agent patogene Xz38. I a mas de los piquar de serúm aniliätor e passat los cinc jorns de qrantena* sus terra, poran demorar contunhar viatjar sus terra.
— V-òc-es chefa.
— Sei pas vòstre chap, màs ‘na paucha numerica…
— Òc-es, dobla ta part de 0 e de 1 per mieijorn, quò te vai entau ? Mas ‘tend te, veiquí Anoni de l’astrò-pòrt. Dintra inteligenças artificialas, devetz be copinar, non ? »

L’Anoni entret ne’n comunicacion mai la Celestina per confirmar que en ‘queu mandin de decembre, tot eriá bon de lur costat.

Las quatre bouadas de lumira fugueten laschadas e còp-sec un ralh se tornet dessenhar coma per toschar lu veisseu.

A son bòrd tot eria que rotina, tant lu module energetique, que eriá estat isolat dau restant, que los quauques malautes de l’espaci, los qu’avian dau mau dintra la tripla diferença de pesantor, l’artificiala de la basa Luna², la fòrt reducha dau veiseu e la que ‘nava pas tardar de se far coneitre sus terra.

Sus terra, le pòrt s’etot s’adobava desempuei la tora de contraròtle. Las familhas avieisavan tot ‘queu monde desempuei las veirinas de la sala d’espera. Los mecadroïdes se preparavan lu long de la pista, las lums començavan de clinhar un pauc pertot, los camions erián prests per intervenir, lu colador de plastique, dès la Celestina pausat vendriá se jaspir apres lu veisseu.

Desjà los quatre luminons traucavan los ciaus que lu monde regardava las manòbras la testa ne’n arrier, prest de segir lu veisseu dins sa davalada.

L’eslauciada fuguet brèva. En ‘queu mandin de 3016, lu 3 de decembre ancianna data terrestra, una besonha faguet petat l’astrò-pòrt de Devil’s Tower.

Lu pòrt, los veisseus, las familhas, lu personau present, tot aquò nos fai comptar quauquas dos mila victimas… e pauc, fòrt pauc de chaënça d’arretrobar daus subrevivants.

_____

* entau dins lu diccionari.

-!-

~ 870 mòts per lu chapitre 2

Publicités