NNWM 2016 J-5

Los utilhs dau NaNoWriMo :

  • Un quasern, me ne’n prene un linhat solament, format A5, 90 g, dins luquau fase sens la traçar ‘na tauvera.
  • Un « estilò » (coma fau escrire), ne’n prene un que l’encra pòt estre eschafrada.
  • Los libres seguiants

de’n prumier :

Gérard GONFROY : dictionnaire normatif limousin-français (N°55 bis – Lemouzi)
Jean ROUX : Vocabulari occitan-francés (Novelum – IEO)
Jean ROUX : Per aprener l’occitan – Précis de conjugaison (Novelum – IEO)
Michel TINTOU : dictionnaire français-limousin (N°178 – Lemouzi)

de’n segond :

Michel CHADEUIL : Expressions et dictons du Périgord et du Limousin (Edition Bonneton)
Jacques FAURY : le parler charentocien (CPE editions)
Michel TINTOU : Grammaire limousine (N°85 bis de Lemouzi)

E ‘na tresema lista :

Peir DESROZIER & Joan Ros : l’ortografia occitana – lo lemosin (CEO)
Léon DHÉRALDE : dictionnaire de la langue limousine – diciounāri de lo lingo limousino
Nicolas QUINT : Grammaire du parler occitan Nord-Limousin Marchois (La clau lemosina)
Joseph ROUX : Grammaire limousine (N°196 Lemouzi)

ses obludar ma Mair, que qu’es pas un libre segur (>fr), mas quante sabe pas dire un chause, li telefòne :

– Coma quò se ditz ne’n patoès ?
– Ooooooóo ! Ne’n sabe res me !
– La veisina vai ben ? Tu ses  ‘nat au vargier, bon, aquò permena lu chin.
– ‘Tend-te, ton besilh qu’es un *** , fau dire entau dins ‘queu cas, entau se… autradament… màs beleu entau… o coma disen alaï, entau, mas qu’es pas un mòt de chas nos.

Normaladament, escrive un brolhon, las grandas linhas, tòrne las metre dins lu logiciau e tasche de publiar dau diluns au ‘vendres, que la dimenjada fase un june numerique. Beleu que vau programar daus bilhets mas quò vòu dire de los preparar un temps d’avança, promete pas.

Apres, dins los obgiers que me son utiles, i a :

  • Ma lampa a òli.
  • Ma teïèra, mon mazagran, ma tisana que fase la culhida a la prima un ser de luna chabròla (sei ‘na p’ita vielha dins mon avenidor).
  • Per la musica, de las vetz la dicha « classica » o d’autras vetz, los enregistraments de ma mair mai ma granda, per me creire « ne’n familha ».

Minja pauc lu temps dau NNWM (i a dos ans, perdí mesma 5kg, lu NaNo es lu melhors daus regimes), e dins la mesada sòrte pauc. Me sei reservar la Veloruci’ (>fr-fcbk), un viatge aus Amics de la linga d’òc — París (>òc-fr), un jorn per lu forúm alimentari, beleu un o dos filmes, gaire mai, perque fau minjar NaNo, pensar NaNo, durmir NaNo…

E faudrá trobar dau temps per fusinar la tiala daus « nanowritors » e de las nanautritz perque quò m’a estat dich que « una per lu mens », v-òc-es ‘quela-quí que son nom fai tremolar la tiala mondiala d’aicï chas GGL, ‘nava iò far en occitan.


Pour les « francofones », des conseils pour réussir le NaNoWriMo sont disponibles icitte (>fr), le site des french-wrimos se trouve là (>fr).

Publicités

3 réflexions sur “NNWM 2016 J-5

  1. Melania 01/11/2016 / 09:01

    ò fant de lop coma siás organizat!!

    J'aime

    • janpeire 01/11/2016 / 13:55

      ‘na vertadiera bestia per ‘nar correr l’espaci 🙂

      J'aime

Les commentaires sont fermés.