‘Questa vetz, ne’n sei…

…de los que comprenan res-de-res.

Au bujadomatique, ‘na vetz de mai, m’apercebe que lu monde moderne m’ai de mai-en-mai estrangier. Plante lu decòr de’n prumier. I a ‘na femna que ‘cata son agte sos la pintura e darrier son pomafòne ; li daisset ma plaça lu temps du sechatge que me vau au bar charchar de las eideias per ma cronica dau vielh cobilhon. I a ‘na goiata que li ‘rachar un bonjorn es tant aisat que li ‘rachar ‘na dent, e un goiat.

‘Na vetz mon cafiron pres, m’entorne au bujadomatique.
Los tres erián ‘quí pausats, fideus au decòr, chietats sus lu banc coma los vielhs autravetz a la velhada, mas aquí, pas per ne’n contar, coma fan los zombifònes, chascun a lu nas jaspit sus l’escran, afe, qu’es entau que vire lu monde.
Vei-me-quí apres destriar mas malinas de mos chamisons, triar mos boxers de mas chaucetas, de los plejinar avant de los forar dins ma biaça que los jòunes vibreten.

Per de verai, ilhs vibreten. Sabetz beleu pas que dins los òmenoïdofònes, n’i a que los pausar los uns a costat daus autres, ilhs poden « comunicar ». I a un messatge que fai brindelar l’escran, i a ‘na vibraci’ e d’un còp, la gens saben qu’ilhs poden « comunicar ».
Saber grán pas perque quò se desclenchet màs passat 20 minutas, i a quò de las foncci’s secretas (m’es ‘vís per alhors que beleu me ‘ní farfolhar dins las bedalhas de mon aisina, mas que los jòunes son pertidas prenantas dau sistemi que los esbolha).

Afe, veiquí pas mon goiat apres damandar a la goiata « de que v‘autres escotatz ? », e la goiata, mesma pas espaurida de li dire « de la musica de comedia musicala ».
Lu tipe li diguet que se ne’n escotava jamai, çò que faguet que la tipessa li diguet « tots los gosts son dins la natura » o quauquares entau, pòde pas acertar las parolas perque ad aqueu momint, fuguet pres d’un rire gras.

Dissí pardon, mas poguí pas dire perque eriá espofidat de rire.
Aürosadament que mon linge eriá ‘chabat d’estre plejat perque qu’auriá virat brun per me, que lu tipe comprenguet fòrt be se perque risiá…

Paubre monde que fau 10 miliards de technologia per poder se parlar.

Publicités