Sei sos Xubuntu

Mon #linux qu’es #xubuntu !

Non, Xubuntu (>en) es pas lu chafre d’un besilh virtuau que ven dau monde de Leberon-Gò, lu juòc que fai furor chas los jòunes de l’occitanistan — e i aguet de la gent per los virats ! Tots ! Ente vai lu monde 🙂 — e dau monde grand, non, Xubuntu es lu nom de mon « OS — Operating System », lu sistemi operadoire de l’ordinator

Adonc, un bilhet per parlar de mon OS, e non pas mos ròges.

Vos saber que la Xubuntu 16.04.1 LTS es la prumièra dins la seria que la maintenança es possibla d’aïci los 3 annadas d’arribar, mai-que-tot, i a lu bureu legier coma tot Xfce 4.12.

E d’enquera mai, i a los utilhs per las mesas au jorn daus logiciaus, las aisidas per eschafrar las fautas dins lu domeni de la securitat, e per ne’n ‘chabar mai la virada d’un bocin de teiste trobat sabe ente chas daus informaticians, los utilisators que son sos Xubuntu 14.04.4 LTS — Trusty Tahr — recegueten ‘na notificaci’ dins ‘queu sens.

Bon, vau ‘restar aquí lu pitit juòc. Sei sos « un » Linux desempuei longtemps. Lu sistemi, lu decubrí ne’n 1998, mai la Mandrake.

Istoricament, m’aviá ‘chaptat mai mos prumiers sous, ma prumiera moneda ganhada, un Amiga500, qu’es de voler lu reviscolar qu’auviguí parlar de Linux. La Mandrake eriá un chause aisat per tornar de nuòu un vielhs pece. Aisat per me vòu dire « metre lu cede dins la tireta, ‘pulhar sus « enter » e « quò marchará be ». Bon, l’escran gris mai ‘na crotz me fagueten sonjar que « v-òc-es, la rata marcha, mas i a res coma los eimatges dins lu magasine, Linux sembla ‘na marda ». Daissí pas davalar la chausa desempuei la pus nauta montanha de Bauça, i torní e ‘chabí per aver un bureu, los imatginons, e tot-lu-totun.

Dau còp, jurtà las annadas 2000 restí sos las Mandrake, devengudas Mandriva (>en) au fiu dau temps, puei, i aguet pus res de bon chas ilhs, e coma per asard, mon pece s’esbolhet.

L’an passat, raubí un pece vielhs au trabalh, e dins un prumier temps, vouguí i metre « un » Linux. Lu derivat de Mandriva, Mageia (>fr), s’instalet pas, mesma per lu testar « ne’n directe », la Ubuntu (>fr) persentet un bureu « charjat », i aguet que la Mint (>fr) per me plar — jamai aürós queu-qui.

Puei, dins un magasine, trobí un cede mai la Xubuntu, qu’es de dire que ‘na distribuci’ Ubuntu mai lu bureu Xfce (>fr).

Insiste sus l’afar dau bureu, que Linux, entau disant, quò vou pas dire grand chause. Dins « Linux » i a un nojeu, daus programas libres o non, daus programas perticuliers que van « far la distribuci’ — Debian, RedHat… — e un bureu — KDE, Gnome, Xfce.

Per parlar de « mon » Linux, veiquí mon bureu ‘na vetz l’ordinator pertit.

xubuntu1

Çò qu’aime sos Xfce, qu’es la personalisaci’. Aquí, farjí ‘n’amassada de 6 icònas, l’una per la tireta ente son tots los programis, un pauc coma lu menu desmarat de Fenestra© o lu menu poma de chas Pomafrucha©. Una icòna ubra lu gestionari daus fichiers, una per reglar l’escran

xubuntu4

xubuntu2

puei 3 tiretas que son daus menus mai sos-menus, aquí la tireta « tiala »

xubuntu3

Sos Linux, i a de que legir los filmes, los eimatges, tener un ciber-caier dins la linga lemosina.

xubuntu5

xubuntu6

xubuntu7

E quante l’enveia de chamjar la configuraci’ vos pren, podetz lu far semblar a Poma© o Fenestra©.

xubuntu8

xubuntu9

Mon fond d’escran es ‘na fotografia de la Katarzyna Załużna (>ru), que son trabalh li fai prener de las cagolhas sos la pluèia.

Publicités