Ni l’esperit, ni lu Būdha

I aguet quauqu’un per me far la remarca que, la setmana passada, passí d’un diau ad una planeta, çò qu’eriá sinha d’un desboiradís dins ma testa. De segur, sei pas sens saber que Mercuri — Ermès — Viu Argent per son chafre dins lu domeni de la chimia, es lu diau daus viatjors, daus merchands e adonc daus raubors.

E jurtament, ‘quela dimenjada de fin de julhet fuguet l’enchaison de veire coma l’eideia de laïcitat fuguet raubada per los totalitaristes d’eistresma dreita de bana coma los religiós tant catolistes qu’islamistes, dau ‘vendres au dimenc, quò ‘restet pas, los uns chas los autres.

« Sem tots apariats » digueten ‘quilhs merchands de creiença.

Segur qu’ilhs binan de consent contre los maucreisants, e per iò dire tot emb-d-una, me sente visat quante « l’unitat novela » obluda volontarament la possibilitat de « ne pas creire ».

Mas, setz pas ‘quí per vos pardre dins las forchas de ma cerveletoneta. Vau balhar lu cas public dins lu « zen », la seria de l’estiu :

Un jorn Font-dau-Sud fai la visita au mestre Nirvāṇa-daus-Monts Baizhang.

Zhang li damanda : « Los savis an-t-ilhs ‘na doctrina que jamai erpauseten dempuei los ancians temps ? »
Font-dau-Sud : « V–òc–es. »
Zhang : « Quala es ‘quela vertat que jamai fuguet erpausada ? »
Font-dau-Sud : « Ni l’esperit, ni lu Būdha, los estres nimai. »
Zhang : « La diguetetz. »
Font-dau-Sud : « Ò montre entau fasent. E vos, Mestre ? »
Zhang : « Sei pas un grand òme dins lu saber : coma porriá-ieu saber que ‘na vertat jamai dicha eissista o pas. »
Font-dau-Sud : « Comprene pas. »
Zhang : « T’ai desjà dich pró de chause. »

_____

Stança :

De tròp tener compte de tot porta tòrt a la vòstra vertut,
Res dire es fòrt melhor
‘Nar segond las vagas de la mar granda :
Aquò porrá jamai vos estre balhar.

Publicités