Pissarata-òme

Veiquí pas que lu temps de l’estiu, lu cinemà d’art & d’eissai balha daus filmes ancians, de segur, qu’es son fond de comerci, mas dau mesma biais daus filmes un pauc pus leugiers perque la vita es facha de susrire maitot, sauv sus la Pravdòc (>cat).

Entau fasent, ‘ní veire Batman, lu de 1966.

Un filme dau Leslie H. Martinson, ente jugan Adam West e Burt Ward, directament copiar de las bedes dessenhadas per lu Bob Kane.

L’istòria es pas complicada, i a lu Joker, la Catwoman – virat ne’n « la femna margauda » dins la V.F. – lu Sphinx e lu Pingouin que s’agropaten per raubar ‘na machina per ostar l’aiga de la gents una prumiera vetz e quante l’aiga torna, ilhs tornan uman. L’O.N.U. es jos la menaça dau grop.

Bon, qu’es pas tant per lu filme que non pas per los paubres trucatges que fau ‘nar lu veire. Quauques eisemples : l’eschala davala de l’elicoptera, mas coma sem dins lu Bat-coptera, sus lu darnier barreu i a de marcat « bat-eschala », parrier per las portas o los esquipaments darnier crich. E passa aquí sus los super-eroïs apres correr dins las ruas per m’aprueimar de la machina que forçadament, es de las mai sofisticadas dau monde ; quante fau tornar l’aiga per reviscolar lu monde de l’O.N.U., qu’es un meschaënt dosilh de laiton que lu Batman dubris.

Ne’n parle perque, i a lu cinemà d’un costat, de l’autre la vita. Los ‘vendres apres-meijorn vau ad un jardinon dins un centre sociau per me passar lu temps.

Vei-me-quí apres plantar 3 saladas e ostar l’erba quanta la tipessa de l’arcuelh me crida « vaque viste, i a ‘na bestia, nos fau un òme ».

Segur que còp-sec eriá pertit per sonnar chas los veisins ne’n querre un, d’òme, que ‘la crida ‘na vetz de mai « qu’es per ‘na pissarata, am ne’n paur ».

Mai me ne’n ai paur mas iò montrí pas. Entrí, dissí ent’es-la ‘vant avieisar ‘na p’ita bola aflaquida per terra. Me cliní per la ‘massar e la tener contra mon peitrau. ‘Na vetz defòra, la pissarata s’envolet.

Un eroï lu temps dau te, jurt’avant que la bredassada de servicí faguesse un liam d’intra « tu parletes de Batman » e « pissarata », lu asard eisista pas per las cervelas malautas, apres lu te, eriá membre dau complòt mondiau.

Publicités