Un tren-tram a Lemòtges per acordar la vila coma lu territòri.

En defòra dau titre desvelopat coma un eslogan per ‘na propaganda, veiquí ‘na virada d’un bilhet publiat de’n prumier sus Veitura-Liura – la vita sens banhòla(s).

Lu tren-tram seriá beleu un respons per Lemòtges dins lu domeni daus transpòrts ! ‘Quela responsa es farjada per dos jòunes que trabalhan dins l’architectura de bana coma l’urbanisme o d’enquera lu desvelopament « ouèb », responsa au soschament dau coma far per portar quauquas 435 000 personas alentorn d’un raijon d’un seissanta de kilometres.

Antonin Boyer e Alexandre Brahim-Beyrand son amics desempuei goiat e farjeten ‘n’associaci’ per parlar dau lur progier. Coma d’autres jòunes e perque son passionats per l’istòria daus transpòrts per vias ferradas e dau tram* dins la Nauta-Viena, asoatarián se ‘pulhar sus quò qu’eisista per far rotlar un tracasson sus lu chamin ferrat.

Los dos jòunes fan saber que dins mai d’un tragier de la meijon per ‘nar au trabalh, o b’etot de la meijon per las estudas, son dins çò qu’au jorn d’aüei ‘pelam « l’eschange per rota dintra la vila e la campanha ». Es aquí que lu tren-tram tira sa gulha dau juòc, coma ‘quò se fai ne’n Euròpa, ne’n Alemanha sus la linha Sarrebruck-Karlsruhe, o d’enquera a Porto au Portugal.

La Nauta-Viena es pertant richa d’un dau mai grand reseu de chamin de fer de França, construch ne’n estela de uech branchas de mai de 400 km de vias sus losquaus son essegar mens de 50 garas.

L’eideia es far rotlar un tren-tram, legier per la pertida vilauda dau chamin, mai costaud per la campanha. De per los crosaments de las vias, avecque un tren totas las demioras, i auriá un batament de belu dietz minutas dins lu centre-vila. De per çò qu’eisista, i a mestier de crear ‘na vintena de stations novas per far ‘nar lu tren-tram dins tots los cuenhs de la vila, ne’n mai de las doas garas actualas, dins mants cas, i a nonmas un ranjament de far – los trepadors, coma i ‘ribat per eisemple.

Per aura lu progier es estimat ad ‘n’autor de 600 milions, beucòp mens que lu metrò de Tolosa, mai-que-tot que per tant de moneda i a las veituras, l’electrificaci’ e las vias de bastir. Los temps de tragier serián divisar per dos, per eisemple Lemòtge-Aissa prendriá 7 minutas, los Benedetins-Tiviers 40 minutas.

L’Antoní e l’Aleissandre son per farjar un reseu de 400 km e obludan pas de balhar ‘n’autra definici’ dau centre de la vila.

Per iò dire tot emb-d-un, lu tren-tram es brave progier per Lemòtge e lu canton.

_____

* pòde pas me far a l’eideia d’un « tramvia » e un « tramóës » me sembla d’enquera mai dangerós, adonc « tram » per « tramway ».

Publicités