Au mitan de Fukushima – KAZUTO Tatsuta

Sos-titolat « Lu jornau d’un trabalhor dau nuclearí dins la centrala 1F »

– Apres lu manga vertadierament pas geniau dau IMASHIRO Takashi – Maliça nucleara – me falià ‘n’autra besonha per compensar, per tornar prener lu dessur e tornar creire que las manga poden balhar la clarda sus los problemas sociaus dau monde.
– ‘Quò vai grand ? La plueia te donet la feure ?
– Non, mas dins ‘na societat regentada per lu « fau-far-aisat », beleu qu’un libre d’eimatges es la desbuta, lu punt de despart d’une presa de consciença ?
– E be, non pas tener daus perpaus lenifiants, te fau beleu passar a la banda dessenhada.

L’òbra desbuta ne’n 2012, quante l’autor reüssit de sa far embauchar sus lu site de la centrala nucleara de Fukushima. Apres ‘ver « prengut » – reçaubut – la dosa limita de radiaci’s per l’annada, eu s’entorna a Tōkyō. Es ad aqueu momint qu’eu se determina per tesmonhar sus son eisperiança.

‘Tenci’, i a p’un nom de verai en defòra dau nom de la centrala, que quò siguesse los de las societats, los daus trabalhors, lu quite nom de l’autor es pas lu bon.

Qu’es pas tant que lu tipe òsta lu vela sus daus secrets ben gardats, de las faussas facturas o de las errors dins lu bastit, i a ren dins ‘queu genre dins lu libre, non, qu’es ‘na protecci’, beleu culturala, que fai qu’eu vòu pas prener posici’.

‘Quò pòt se comprener dau punt de vuda « patriotic », un sentiment fòrt chas l’autor, çò que balha de las casas ente son mes en oposici’ la paraula daus mediàs e sa realitat vecuda. Lu tipe dessanha ‘na esbolhada e lu filactère ditz « aimariá que los que disen que ‘queu bastiment davalesse e lu Japon pòt estre avalit, ò viguessen ».

Mas eu vira vertadierament dau costat de la companhia d’electricitat quante eu fai dire ad un de sos personnatges que quò fai l’afar de quauques uns que l’accident siguesse totjorn pas resòugut, entau fasent, las lurs revendicaci’s se troban legitimadas*.

Maugrat aquò, beleu perque lu dessenh es agradiu, la legida es bona perque qu’es ‘na seguida d’anecdòtas dins un mitan malaisat, ente la faiçon de trabalhar es grandament codada, perque i a de las p’itas nhòrlas bonas per « cassar » l’eimatge abitualament ‘taschada au Japon, pense aquí aus chiadors, o au ròtle daus mafieus dins la chadena de la distribuci’ dau trabalh.

  • Qu’es lu limerò 1 de la seria, de trobar dins las bonas librarias, esditat chas kana (>fr)
Publicités