Un disnar per la S.

Un pitit disnar per la S. que son non es pas desconegut aquí, fau usar dau motor charchador dau cibercaier.
Un disnar pas lu darnier de l’annada, mas pas luenh perque ‘la anguet far las empletas… non, qu’es pas me lu responsable. Non pas que coma dins l’afar daus papierons dau Panamà, se moche qui es vormós, se grate qui es peulhós, mas, S. e me angueten jamai maniar lu varruelh de quauques sents dins quauquas ‘gleisas que siguesse, pòde l’acertar. ‘La aima pas ‘quò, visitar las ‘gleisas, de que que v’autres ‘natz sonjar.

Afe, desjà un mes e ‘la vos enferna la vita, tres mes de mai e ‘la vai pus poder estre tenguda. I a de las rasons a ‘quò, de segur, mas pitits 😉

Afe, un pauc de « food porn » coma disen los anglès e los francès, e beleu d’autres de per lu monde grand, nonmàs doas fotografias dau minjar, per far aisat.

De’n prumier, vau passar la sopa d’ortruja, los faus « burgers » de lentilha :

1/ Fasetz trempilhar ‘na nuech doas veires de lentilha verta (dau Puech, dau Berri…),
2/ Las rinçar puei las passar au molin apchor,
3/ Apchatz ‘na p’ita ceba, o la meitat d’una grossa,
4/ Boirar la ceba e las lentilhas, ajutatz ‘na pincada de sau, ‘na pincada de curri, ‘na bona culhera de mostarda.
5/ Normalament, atz entau fasent, una pasta bona per modelar 6 « steaks ». Per los cueire, fau los passar dins l’òli, 5 minutas per faça. Per cas que la pasta siàia « mòla », ajutatz una culhera de fecula.

IMG_0054

Sugestion de persentaci’ – La fotografia es pas estada manhiada sos fotochòp©

Coma li fau pas tròp de ‘quò-quí, pas de ‘quò-laï, nonmàs un brejon de ‘quò… paubres, dins 3 mes, e dins 7, afe, irai a Bordeu me mocar d’ela.

Entau fasent, coma per mon anniversarí ma sòr me balhet daus mòtles per sushi e maki, faguí daus maki-kiwi.

1/ Dins los sushi, tot es dins lu ris. Per 40 sushi, fau beleu 400g de ris « speciau sushi ». Fau le netiar un bon momint sos l’aiga per li ostar l’amidon. De blanc, eu passa a clar. Apres, fau lu laissar se pausar 30 minutas dins un colador fin, lu passar una darniera vetz sos l’aiga ‘vant de lu cueire.
2/ V’autres atz un cuissor speciau per lu ris, vos fau segre la notiça.
2’/ Dins un cuissor lent, fau metre lu ris, puei 700 ml d’aiga. Lu laissar montar chaud avant de tuar lu fuòc e daissar se far la cueisson dos oras de temps.
2 »/ Dins ‘na caçairòla, fau metre lu ris, puei 600 ml d’aiga e portar a bulhir. Baissatz un pauc lu fuòc 3 minutas de temps, tornatz baissar lu fuòc un còp de mai per 10 minutas (d’aici que l’aiga siàia absorbada) puei tuatz lu fuòc per 10 minutas de mai.
3/ Dins un bòl, boiratz un pauc de sucre (2 culheras plenas, mai quante qu’es per un dessert) mai 70 ml de vinagre de ris (o de citre, ‘quò pòt far l’afar).
4/ Dins ‘na topina, boiratz, doçadament per pas l’esbolhat, lu ris mai lu vinagre sucrat e un pauc de sau (un culheron).
5/ Eventatz lu ris per lu tornar a la temperatura de la pèça.

Far los sushi es pas complicat, d’enquera mens coma un mòtle, far los maki es d’enquera mai aisat.

Mete aquí un filmonet que persenta la besonha. Los far sens es màs un còp de prener.

IMG_0052

Veiquí los maki-kiwi, e maki-banana, sens la « ficela » d’alga (femna presa, femna « caganta »). La color bruna es deguda au sucre utilisat, un sucre non-rafinat.

Publicités

Une réflexion sur “Un disnar per la S.

  1. aredius44 10/04/2016 / 09:22

    Quand il s’agit de cuisine, on se comprend !

    J'aime

Les commentaires sont fermés.