Fakir qu’esdita daus libretons

Fakir, l’associaci’ que s’esnertís mai tot, o beleu, qua’iment, tot lu monde nos envoiet 3 libretons au mes mòrt. Prenguetem de los legir e aura de ne’n dire dau ben.

Son persentats entau :

La gent intellò, ‘quò escrís daus libres, e dedins ‘quilhs libres i a plen de mòts que fan brí-brí dins la testa, alaidonc, Fakir farja ‘na novela culhida de libre, sos la fòrma de discutida, per metre las eideias d’aquilhs pensors, lurs conceptes, lurs biais de d’aviesar las chausas a la portada de chascun-a-s.

Jean GadreyContre los pipaires de la creissança

La creissança es un dògma que pausa lu barrador sus los desacòrds d’intra los Hollande, Sarkozy sens obludar la CGT, la CFDT o lu patronat : la creissança tornará sautar quante la fisança fará eisir la creissança que tornará… ‘Questa pensada « voudou » es batalhada per un economiste coma lu Jean Gadrey desempuei quauques 15 ans. Aquò fai que la discutida menet los de Fakir, de bana coma lu Fabrice Lallement, un de la CGT e de la descreissença, ad una permenada dins las eideias daus Keynes o John Stuart Mill, ad un questionament sus la valor dau trabalh, las rasons que iò fan una « valor » tant morala que bona per « aidar dins los eschamges economiques ».

Richard WilkinsonL’egalitat qu’es la santat (e l’amor maitot)

Per ‘na descuberta, quò fuguet una descuberta. Lu libreton persenta lu trabalh dau Wilkinson, un trabalh d’estatisticas, de ‘nalisas sus los liams que pòt i aver d’intra « l’egalitat » dins una societat e tots los maufonccionament d’aquela societat. Tots los domenís i passan, tal la criminologia, las drògas (legalas o pas), l’espsicologia per qua’iment totjorn balhar que mai una societat vai dins una diminuci’ de sas inegalitats, mai es una societat dau benaise, que passat un punt, mai de moneda fai pas la gent mai aürós.

Lu libre, l’originau, fuguet escrich coma sa femna, Kate Pickett.

GramsciGanhar de’n prumier las batalhas de las eideias

Es una discutida imaginara per desboirar las eideias escrichas dins los carsernets dau Gramsci.

Entau fasent, los « mòts complicats » de l’intelectuau comuniste son eisplicats, eiclarsits.

Publicités