Tornar usar d’aici que ‘quò siguesse besilhat.

Veiquí un biais de tornar usar las boitas de jus de fruch o de « lach » d’ametla, de nosilha, de ‘vena o de sabe que v’autres podetz beure.

Fau saber que las « bricas » son pas aisadas de reciclar perque qu’es un materiau « complexe » coma ‘quò se ditz. Adonc, quante atz l’enchaison de prendre dau jus dins de las botelhas de veire, qu’es lu mielhs*, e se avetz la possibilitat de jamai beure un quauquares que surt d’un chause de plastique, qu’es d’enquera mielhs.

Lu biais de far dins ‘queu bilhet es per la boita « carrat » d’un litre, veirem las bricas rectanglas dins un second bilhet.

Vos fau :

  • – ‘na boita netiada e duberta aus dos pecons.
  • – daus ciseus que normaladament fau pas metre un plurau, afe.
  • – de l’òli de cobde, un pauc de temps, l’enveia…

Daus punts 1 a 4, fau copar la boita sus la faça de « davant », d’aiçí a servar la lonjor utila (aquí 130 mm).

lach1_4

Daus punts 5 a 12, fau copar la boita sus la faça de « darrier » e descopar los costats, sens obludar de servar la lonjor que vos fau.

lach5_12

Daus punts 13 a 15, fau copar las languetas. ‘Tenci’, fau ne’n gardar una mai lonja per poder barrar la boita.

lach13_15

Aquí la partida malaisada, de’n prumier, punt 16, fau plejar segond l’espessor desirada (15 mm dins l’eisemple), daus dos costats de la faça avant (personalament, per iò far, prene un pitit bocin de buesc de la bona nautor).

lach16

Punt 17, lu mens aisat, fau plejar au mitan e vers l’interior lu restant dau costat. Aquò se fai ne’n junhant los plejadís. E fau iò far tot parrier de l’autre costat.

lach17

Aura, i a pus que de plejar las languetas, dins l’ordre lu punt 18 (lu bocin « aria » dins l’eisemple) plejat dins la boita. Punt 19, qu’es maitot dins la boita que fau plejar la seconda langueta dau naut per tener lu plejadís.

Punt 20, la pi’ta langueta deu estre plajada dins los plejadis de’n prumier, e apres, mesma operaci’ per la granda sens obludar de « marcar » l’espessor.

lach20

V’autres atz aura una boita per portejar un porta-onda (o jaspit-aurelha, brutla-cervela, intelifòne, telefonet, telefoneton, telefonetononet, sens obludar l’esmartfone ne’n occitan blos e oficiau))

intelifone3

Eisemple de persentaci’ – eimatge non contractuau

« Aria » & « au bon aër dau lemosin » eissistan pas coma noms de produchs dins la vita de tots los jorns

🙂

_____

L’eideia dau pliatge es de me…

– Compta beleu sauvar lu monde mai ton plejadís ?

… setz liures de ne’n far quò que v’autres voletz.

– D’enquera aüròs que sem libres !

– Atz pas ‘chabat de repiapiar…

_____

* per far un « jus » de chastanha per eisemple, fau boirar 20~25 g de farina dins de l’aiga (~500 ml) puei chaufar d’aicí lu bulhir. Fau remudar un momenton, cuar lu fuòc e daissar refresir. Un tau jus se garda 3 jorns, pòt estre sucrar.

Publicités