La meijon a la teulada roja – Yoji Yamada

« La meijon a la teulada roja », un filme japones dau Yoji Yamada (2014).

Dins lu Japon de las annadas 30, Taki daissa sa campanha per far la paucha dins una p‘ita meijon borgesa, dins los barrís de Tōkyō, chas la genta Tokiko, son òme Masaki e lu goiat de 6 ans.

Un jorn lu bra‘e Ikatura rintra dins la vita d‘aquela meijon e Taki avieisa be que queu d‘aquí es per plare a la Tokiko. Lu temps de la guerra ’riba e la jòuna Taki vai dever prener una decida tarribla.

Veiquí per lu resumat d‘aqueu melodrame, que mai d‘una vetz, me pensí estre dins un roman de la Aki Shimazaki (>lm). Lu tira-lagrema es pausat des la desbuta.

L‘istòria de la Taki es contada per son nebot que li faguet contar sa vita, coma ela deguet pardre son biais de dire, son accent. Coma son prumier mestre li aprenguet la qualitat esperada chas una paucha. Eu li fai la morala per parlar de l‘uelh que porta lu Japon sus son istòria, pas totjorn aisat mas me songe que la França a res d‘enviar au Japon dins ’queu domeni. Qu‘es se que troba dins los afars de la tanta son secret, ben sarrat dins una envelopa barrada.

Lu filme fai doas oras, i a de las longors de segur, mas coma mas larmas son d‘aur, faguí pas lu compte.

Publicités