« Le retour de la bicyclette – Une histoire des déplacements urbains en Europe, de 1817 à 2050 » es un libre dau Frédéric Héran. Qu’es un libre per militar. Tant « Le pouvoir de la pédale » dau Razemon, que ne’n parle aquí (>lm-fr), desboijava lu chamin, tant queu-quí ‘nalisa, critica las politicas mesa ne’n plaça, las chifras per ‘pulhar son perpaus.
La legida dau libre, un pauc austere, es pas totjorn aisada, beleu, mas ela forja una solida cultura de l’istòria de la becana. Ela balha de las eideias bonas au sugier daus amenajaments de far per tornar desplejar l’usatge de la bicicleta chas los vilauds.
L’autor, lu Frederic Héran, es mestre de conferença dins lu domeni de l’economia, charchor ne’n sociologia. Dès la desbuta dau libre, la tonalitat es balhada, la becana es pausada au mitan de « l’ecò-sistemi vilaud », qu’es de dire lu copilhatge « mòdale »* daus utilhs per botjar metuts ne’n faça los uns daus autres segond las epocas.
La bicicleta es filha de l’Euròpa, adonc, l’autor nos permena ne’n defòra de la França per avieisar lu perdeque alhors quò sembla ‘nar mielhs, ne’n aprofeita maitot per cuar l’eideia dau gène de la becana que la gent dau nòrd de l’Euròpa aurián.
‘Queu libre balha ‘na bona responsa a las questions que portan sus :
– Es ‘quò sufisent de far la multiplicaci’ de las pistas per que lu nombre de cicliste montesse ?
– Coma e perque lu centralisme de la França faguet pardre 30 annadas dins lu domeni dau desplaçament ?
– Perque los ciclistes son totjorn de passar au fuòc roge ?
– Perque portar un casque deu estre una chausida prsonala e pas un afar de leis ?
La legida ‘chabada, degun pus se trompará d’adversari, mai-que-mai que per delai las ridelas de l’istòria i a de las tiretas clafidas de bon parlar, e perque totas las informaci’s son sorçadas.
- Les lecteurs francophones trouveront sur le blog de l’ADC une traduction de ce billet (>fr).
- Veiquí lu liam de Carfree (>fr), un site sus luquau l’autor persenta son trabalh. I trobaretz 3 filmonets.
Le retour de la bicyclette – Une histoire des déplacements urbains en Europe, de 1817 à 2050
Frédéric HÉRAN. Un livre publié par La Découverte (>fr)
_____
* desbuta paja 9 : « per prener la mesura de l’importança de l’usatge de la bicicleta dins un canton, l’indicator lu mai aisat e lu pus usat es « la part mòdala », qu’es de dire, la part daus desplaçaments realisats montat sus ‘na becana dins la totalitat daus biais d’a pè compres. Un desplaçament per se es lu voiatge realisat per una persona quau que siàia la mòda per se desplaçar, per una rason (trabalh, etudas, las perverci’s…), dintra un punt ad un autre. Un desplaçament qu’usa de mai d’un utilhs es comptabilisat segond lu pus gròs, per eisemple, anar de’n prumier montar sus ‘na becana puei ne’n tren es comptat dins los desplaçaments de tren ».
Rapieta 