Los tres dau libre

Apres lu mes de genier, e apres aver vut lu filme « we are four lions »(>lm) dins luquau visem daus terroristes comunicar tras un juòc per goiassons, e perque los nòstres de terroriste fasián passar los messatges d’òdi dins daus filmes de cuòu, me prenguet l’enveia de ne’n parlar, daus dessenhs animats de segur ; daus dessenhs animats que las religions dau libre usan per far passar lu messatge d’amor dau diu unique qu’es prêt d’esbolhar sa creaci’ quante ‘la li bischa pas los pès.

‘Tenci’, per de las rasons de securitat, vòstra securitat mentala, mete pas los liams per los trobar sus la tiala ; contrarament a quò que pòde laissar sonjar, vos prene per de la gent inteligents dins la capacitat de tapar dins un motor chachador « tau profete – dessenh animat ».

Dins l’ordre d’aparici’ :

Los 10 comandaments : l’istòria es mai-que-mai coneguda. Los judieus son esclaus ne’n Egipte, lu pharaon balha l’ordre de tuar los noveus nascuts masles. Ne’n fau quauqu’uns de tuats avant que LU DIU se descidesse de ne’n sauvar UN ne’n adjudant una familha permis las melhoras. Lu goiat pausat dins un palhisson1 e gietat dins las aigas enervadas dau Nil será velhat per l’uelh dau tot poderòs, d’aici la meijon dau pharaon.

Lu goiat frutjet, i a una batalha per sauvar un esclau, la revelaci’ de sa vertadiera familha, sa damanda a pharaon e las maledicci’s dau diau unique d’aici la liberaci’. Apres de segur, lu fuòc dau ciau bara la rota a l’armada e los judieus poden traucar la mar roja avant la mar de sable e l’arribada a la terra promisa.

Fiu, lu film es en 3D, ben realisat emai los trucatges son pas eistraordinarís per far creire au buisson de fuòc, a la mar escartada o la quita manna2. Aquò en defòra beleu de l’aribada daus dietz comandaments, aquí, fau iò dire, quò pas lu momint de ne’n comptar una au Moïse.

La vida dau Gesus : los catoliques fan contar la chausa per daus eisplorators que son coma diriam, teleportats au temps de la vita dau piau long. Aquí, son daus episodis coma lu còp de l’estela anonçada per una profecia, veiquí que te sauve de la gent dins la mar, fase mudar l’aiga en vin3, que te mete defòra los merchands e que i auria mestier d’i tornar.

Realisat per Hanna-Barbera, qu’es tant joiós qu’un jorn de chauma dins lu pòste.

M. lu darnier profete : mete pas lu pitit nom perque qu’es una version censurada4, de quauqu’un qu’es pas pró franc per se montrar, fau mielhs ne pas ne’n parlar de tròp.

Las chausas aquí son dins una Meca d’apres las revelaci’s, paus de temps apres la mòrt dau M.. Un còble mai una goiata menan vendre ‘na chabra, sus lu chamin, i a un infirme, van l’aidar e ne’n profitar per contar a la goiata, adonc a n’autres-tot, totas las chausas mervelhosas que son dins LU LIBRE. De segur, van pas dire que la calhasa es estada trobada5 per daus bedoins dins lu desert, non, mas van pas oblidar de parlar daus merchands que aprofeitavan de la credulitat dau monde per vendre tot e res aus Jan-bestias.

Lu M. que fai lu bargier es lu nebot d’un chap de la Meca, mas non pas velhar sus l’ovelhas, eu meditava, forçadament, mas lu solelh, un jorn, una vòtz li parlet. Mas pas coma per lu Moïse sos la fòrma d’un buisson e mai ‘na grossa vòtz que fai paur, non, sos la fòrma d’un angeu, mai una vòtz de miau. L’autre, tot ‘queu brí-brí li montet a la testa e vei-lu-quí apres far lu preschor.

Qu’eria pas per plara a tot lu monde e lu M. mai sa tropelada fuguet chaçat, e veiquí la prumiera pertida dau Coran, aquela ente eu es un reformator, coma los dos dau diau unique avant se, un reformator de la vita menada dins ‘queu temps dins ‘quela region. La refòrma concernet principalament las femnas e los esclaus. Ad un tau punt que lu biais de viure semblava quitament a lu daus judieus, i aviá quitament la plaça per d’autras idòlas, pensatz be que l’angeu tornet i dire de se netiar las aurelhas e que quau que siàia, falia ganhar la Meca per esbolhat los faus diaus.

Qu’es que l’unique plasanta pas mai aquò. Estranjament, lu pair que conta l’istòria a la goiata e au tipe se resta au reformator e au coma la Meca fuguet per jamai musulmana, mai l’ajuda dau diau e de son amor.

_____

1) los e las que leguisseten Delpastre saben que los noveus eissits erián pausat dins un palhisson entau sus l’archa, per lu mens en Lemosin e en Charantas (iò tene de familha, ma cosina nascuda apres la guerra de 40, a la ferma pertant, i eschapet nonmàs perque las pervesions fasián fauta, mas l’atiralh eriá aquí).

2) d’alhors, me songe que i a de la gent que serián ben auròs que la manna tornesse. Afe, dise aquò, dise res, quò deuriá pas estre l’afar de tres o quatre prosternaci’s.

3) que dins ma rua, i a un barbut mai los piaus longs que fai mudar la biera ne’n badat, beleu un profete de la vita moderna.

4) Pertant i a un iman que diguet be que qu’es pas bandit de repersentar lu profete (>fr-ma), afe.

5) per iò tornar mai los lemosins, sabetz que las peiras sautan de terra la nuech. Coma la peira sacrada ‘ribet alai, marchatz saber, beleu mai una lemosina.

Publicités