la meijon daus Barbapapa

Apres la meijon daus Peirafuòc (>fr), veiquí la meijon daus Barbapapa.

I a 5 ans d’aquò, la familha Gribaldo comencet de bastir ‘na meijon bulla a Tercillat (en frances) dins lu nòrd de la Cròsa. La mèra de Tercilhat, Colette Streicher-Trigoust, apulhet lu dorsier a l’encontra daus « Bâtiments de France » per balhar lu drech de construre una meijon beleu originala mas ecologica e dins las novelas nòrmas dins ‘queu domeni.

Au mitan d’un prat, a l’entrada de la vila, la « bulla », la sòla pèça per aura bastida fai bargassar : Engenh Non Identifiable, meijon daus Barbapapa (1)…

Lu coble Gribaldo mai los tres goiats son ‘ribats de la Leire Atlantica i a 5 ans, avecque la volontat de trobar un terrenh pas char per bastir « lur progier » e per los pitits chavaus maitot. Trobeten mai l’internet, e son aürós dau luòc : « I a aquí daus liams umans fòrts, n’autres i sem benaises ».

La prumièra bulla es estada ‘chabada graça ad un chantier perticipatife, menat per de la gent dau SEL(2) de la Cròsa, Carrousel. Qu’es la prumiera meijon bulla passiva e « auto-bastida ».

Fau saber que las meijons « bullas » coneigueten una prumiera vaga dins las annadas 1970, mai-que-tot, dins las regions mieiterrenas.

Los planhs son estats farjats per un achitecte emai quò siguesse lu Luc Gribaldo que desvelopet se mesma lu siteme d’isolacion. Las fondacions per poder pausar las dietz autras bullas son realisadas, dietz bullas per las pèças de la meijon. Una vetz ‘chabada, la meijon fará 160 m².

L’autò-constructor parla de las facilitats per chascun de poder iò far maitot. La meijon bulla es per principi sens teulada, bastida sus un rasteu de far sus luquau es pausat un vela de betum.

Mas se aquò sembla aisat a prumiera vuda, lu chantier ‘vancet gaire desempuis 5 ans, nonmàs perque Luc Gribaldo fai l’artisan plombier, quò que li daissa pauc de temps per son proprí chantier.

Lu còble compta aver ‘chabat un jorn, e ilhs se ratraparen sus las esconomias per chaufar e se mòblar, perque l’amenatjament d’una bulla se fai des la construcion, d’integrar los placards.

 Eimatge tirat dau site (>fr) « habitat bulles »

 _____

(1) Lu creator d’aquilhs personatges, l’american Talus taylor dispareiguet au mes de febrier de 2015.

(2) SEL : Sisteme d’Eschange Locau. Veiquí lu liam (>fr)

Publicités