« Histoire bike », la prumiera marca auvernhata de bicicleta per viatjar.

Veire sautar una novela marca dins lu domeni de la becana es forçament un chause que compta, quante los noveus eisits son auvernhats quò compta per dos, e quante per dessus tot son tres per concebre e assemblar de las bicicletas a Clarmont d’Auvernha, ‘quò deven un quauquares en fòra dau biais costumier.

L’istòria de la marca eponima se conta entau :

« Nicolas, Christian e Sebastien amasseten lur saber-far e la lur eisperiença de la bicicleta per farjar « Histoire bike« , la prumiera marca auvernhata de bicicleta per viatjar », quò-quí mai la volontat de balhar un ustilh « especiau per las odiseias luenh-luenh coma per la rota de tots los jorns, un ustilh que pòt repondre a los que damandan beucòp per de las aventuras modernas, qu’ilhs siguessen esperinats o pas. De las gentas bicicletas, solidas, que laissaren tombar degun e construchas dins lu respect de la nòrma europeèna EN14764 ».

La prumiera bicicleta de la marca se pòt vieisar sus lu site liat ne’n fin de bilhet. La « Granda Viatjosa Classica », qu’es son chafre, es estada estudiada dins de las eideias de sobrietat dins lu dessenh mas mai jurtà quò que fau per far chic. Lu costat maliciós fuguet pas obludat per autant, per eisemple lu cadre, la forcha e las rodas son aisats d’estre reparats ente que quò fuguesse sus la planeta, e adaptats mai quò que pòt s’i trobar ; i a mesma un porta-raijon de conhat dins lu cadre, per lu-cas-que-sabem-jamai.

Lu limerò 63 es lu dau Pueg-de-Dòma, qu’es maitot lu nombre de cadre produch ne’n 2014, coma per far un omenatge a l’endrech ente sautet la fabric, qu’es maitot l’enchaison de gardar un uelh sus los prumiers eivís daus utilisators, de las utilisatritz maitot. Se balheten entau una facilitat per ‘nalisar, e ‘melhorar lurs bicicletas, las d’aüei, las de deman.

Veiquí de que prener dau plaser a anar charchar lu pan a l’autre bot dau canton.

I a gaire de viatge sens suvenirs
I a p’una remembrança sens istòria.

Publicités