Chapitre 11 – ‘Mercres 5 de novembre, bar dau pòrt de La Rochela.

Dijatz me pas que m’esperavatz. Aquò me farai plaser, setz minhard, sabetz legir, atz un bon trabalh, mas d’un autre punt de vuda, estre ‘na presa sus un tableu de chaça, qu’es estre mòrta. Desiratz querraque pas me tuar, Alan ?

Alan pauset lu jornau sus la taula per saludar l’inspectritz.

Vos en pregue, am pró d’una mòrta « complicada » entau. E me pensa pas d’enquera a vòstra plaça, dins un o dos ans, perdon, dins vint ans que l’atge de retirada culesse pas plus. Vos atendiá per vos dire que los colleguis d’Esgoleme an ‘chabats per trobar la Maëlina, afe son adreiça e la veitura de locacion que ‘la prenguet per venir a La Rochela.

Son pus daus grands càfe que nos fau prener mas de las bombonas. Anetz, contatz me ‘quò.

La Maëlina viu be chas sa mair, qu’es la tipesse que porteja los requins dins la Charanta. ‘Quela femna, dins un prumier temps, faguet mas traïtar los colleguis de faissistes, totjorn dau costat dau poder, bon per oprimar la gent coma ela que son dau costat de la libertat, e tot lu totun. Puei, reüssigueten de li dire que venián per sa filha. E aquí, ‘la se metet de gigonhar e cridar « prenatz me, prenatz me, ma filha es pura. Atz la mair perdeque prener la filha ».

Passatz, se’us platz…

Apres daus tombareus d’insurtas, ela ‘chabet per dire que sa filha eriá pas tornada meijon desempuei l’Halloween que ‘la festava mai una amija a La Rochela. Mai lu companh de la Maëlina, un vertadier faissiste dau movament Auba Daurada, se, segond nòstre fichier, son quite companh sembla pas aver de novelas. Qu’es quò que nos diguet la mair.

Los colleguis d’Esgoleme damandeten de veire la veitura, e aquí, la mair eispliquet que la Maëlina se servia totjorn de l’APER0′

Le que ?

Lu servicí d’Autò Pertatge Electrique Regionau 0 ‘mission, lu chause de la Dama de la Vertiduta

Desconatz pas, ‘la es ministre, ministressa o ministra aura, sabe pas coma fau dire per ela qu’eriá un temps contre la feminisacion daus noms per los mestiers.

V-òc-es, ente la sopa es bona… Afe, ilhs trobeten la veitura enpruntada, que degun i aviá manhat quau-que-siàia.

‘Quò marcha pas lur afar ?

Damandet la Silvana.

Non, non, non, ‘quò marcha, afe ‘quò rotla, mesma tròp ben, i a jamai de veituras libras quante atz mestier d’una. Qu’es lu tipe de l’agença que iò diguet. Per la veitura empruntada per la Maëlina, lu probleme qu’es que ‘la fuguet mau tornada branchada, quò que la metet fòra servicí ne’n una ora de temps, e avecque lu congier de Tots-Sents, lu tecnician eria pas d’enquera vengut la tornar quilhar d’aplomb. E aquò qu’es ‘na bona chausa, que los colleguis fagueten un grand eisamen de la veitura e dau fichier informatique dedins. Que, vos l’ai pas dich, mas coma i a mai d’una possibilitat per locacionar d’intra quilhs que paian a l’ora, los autres au quilò-metre, tot es enregistrar dins ‘na sòrta de disque dure.

Entau, sabem que la Maëlina prenguet la veitura dins l’apres mieijorn a Esgolesme, que la ‘ribet a La Rochela vers las cinc oras, e que aquí, ‘la bloquet la veitura per que degun poguesse la prener. Migretz pas, es una opcion dau sistemí.

‘La tornet prener la veitura a dietz e nòu oras per per arribar a la gara a vint oras manca un quart. La nòstra Anna arribet a dietz e nòu oras e vint e siei minutas. La Maëlina eria tardiera per ‘trapar la Anna.

Per anar a pè de la gara a l’ostelaria, contetem ‘na demiei ora, aquí, i a un quart d’ora d’escart, pró per la ratrapar mai la veitura sauv que l’ostelaria es pas dins un quartier aisat per i veiturar. Adonc, la veitura fuguet parcada e branchada.

Dins tot aquò, i a ‘na chausa de segur, a vint oras, la Maëlina poviá pas estre au volant e dins la chambra ne’n mesma temps.

Segur. Mas, li fauguet tres quart d’ora per far ‘na tan p’ita distança ?

Sembla que ‘queu ser d’Halloween, La Rochela coneiguet beucòp de banturles dins las ruas. I aviá daus boschons pertot, mesma per las bicicletas.

Autras chausas.

Ooooo v-òc-es, qu’es pas ‘chabat, podetz comandar ‘na seconda bombona de càfe. Coma l’ostelaria es pas dins un quartier aisat per las veituras, la Maëlina programet la plaça coma disponible a condicion qu’i aguesse una veitura libra lu lendeman mieijorn. Es una opcion dau sistemí, que l’ordinator pòt informar que la veitura es disponibla per una ora, doas oras de temps e lu sistemí fai la gestion dau nombre de veituras disponiblas.

Adonc lu dissabde. ‘Quò vòu dire que ‘la comptava passat la nuech.

Òc, mas, dins los enregistraments, a Esgolesme, leguisseten que la veitura tornet prener dau servicí a mieinuech. E aquí, i a un quauquares de mai que trantolha. La prumiera tentativa per prener lu volant tombet a l’aiga per ainsi dire. Fau saber que las veituras son esquipadas d’una aisida per saber se lu conductor a begut o non. E ‘quò sembla que la Maëlina aviá pas suçat daus glaçons.

Normalament, per securitat, es possible de tornar passar sa carta dins la bòrna mas i a un blocatge doas oras de temps. Aquí, e lu tecnician sauguet pas iò eispliquar, beleu un bug, mas ela poguet tornar intrar sa carta e composar son codí sens que la machina se bloquesse, e mai-que-tot, la veitura reüssiguet a pertir.

Comprene pas l’istòria de la carta.

Diguet La silvana.

Per liberar ‘na veitura, fau la carta multi-servicís regionala, e un codí per s’assegurar d’estre la bona persona. I a un codí per una carta, adonc, ‘na vetz blocada, fau doas oras per desblocar la carta, lu codí mai la veitura que comptava prener. Aquí, ‘quò se faguet ne’n doas minutas. Un bug !

Una seconda persona, mai una seconda carta, un second codí. Una seconda persona que beuguet de l’aiga per lu contraròtle, es possible aquò, non ?

Beleu, mas es l’identificacion de la Maëlina que se marquet dins l’ordinator, e ‘quela seconda persona es pas estada identifiada. Afe, pausem de biais quel afar de carta, de codí e de bug. Los sieitís parleten ilhs-tot. Dessur lu reservat au mòrt, la scientifica trobet daus piaus bruns, cospats corts. Trobeten maitot de las traça d’alcòl, dau conhàc, un pauc de ouisqui, un pauc d’aiga maitot. Per aver de las datas, fau esperar un pauc. A la plaça dau conductor, la scientifica trobet un quauquares que a la desbuta prengueten per daus piaus blond e longs, mas l’analisa indiquet que qu’es dau sintetic.

Una peruca ! Un conductor mai una peruca.

Eisatament !

La Silvana surtet un quasernet e tracet una linha per indicar lu temps.

La faussa Maëlina, beleu un òme complice emperucat dau Cristian, arriba a ditz e nòu ora a l’ostelaria. Lu temps que lu Cristian paufinha son alibis mai las nòtas ‘queu laissa au taxi per eisemple, l’emperucat tua la Anna. La vertadiera Maëlina arriba, lu temps de se gara, vers vint ora e quart. L’emperucat i fai quauquares, pòt prevenir son complice.

Fau trabalhar sus ‘quela ipotesí.

Non, n’autres nos sem dins l’error, sabe pas ente, mas perque lu tipe, beleu l’emperucat tua pas la Maëlina dins l’ostelaria ? Perque prener ‘na veitura per anar la pardre a Esgolesme ? Ente es la Maëlina ? Sem dins l’error, se quò se trobe, es un destracat e la Anna se trobet a son chamin. Aures.

Lu Alan diguet.

Me irai be damandat au Cristian Labecqua se eu coneis pas una Maëlina Companys. Se eu a pas ‘quela carta multi servicí de la region. Sabe pas quò que vos ne’n pensatz ?

La Silvana continuava de marmusar.

Sem dins l’error, sem dins l’error. Lu Cristian beguet ‘na limonada verda davant nos, eu semblava pas aver fach la festa, qu’es pas son genre, tròp fiar. D’alhor per parlar de limonada, lu capuchon trobat dins la chambra parlet s’etot. Dins las rajuras i aviá de las traças sechas de limonada perfumada au melon, l’analisa trobet maitot de l’aiga.

Sabe pas de que ne’n pensar.

Diguet Alan apres surtir son pòrta onda que ven de brandir dins sa pòcha. Se botant de’n pè la Silvana balhet lu sinhau per i ‘nar.

La Anna es mòrta vers vint ora, de que fagueten las doas o tres personas d’aicí la mieinuech. De que faguet la Maëlina dins quel afar ? E ente ‘la es ‘quela-quí ? Vau paiar las bombonas e ‘chabaram d’avançar chas lu Cristian, veirem be se ‘quò nos balha de las novelas eidèias.

Lu Alan eriá apres bibar davant l’escran brandat.

Pòde prener ma jornada.

Coma i a grèva daus trens, sei segur qu’anirai pas correr París o Lion per vos far tuar. Vos espere deman mandin au pòste.

Marces.

 _____

 

nanowrimoc

~1450 mòts per ‘queu bilhet, quauques 18 970 sus los 50 000 damandats
(35000 sirán ‘na reüssita de mon punt de vuda)

_____

Publicités