Chapitre 9 Dimars 4 de novembre, pòrt de La Rochela

Dimars 4 de novembre, pòrt de La Rochela

Sens jamai res dire, ‘la se sietava a la terrassa dau cafet dau pòrt, qua’iment totjorn a la mesma plaça, e quò mancava pas, ne’n cinc minutas, un grand càfe, dos sucres e un veire d’aiga ‘ribavan de bana coma l’edicion estenduda de la Charanta Liura dau jorn. Quau que siàia lu temps, quau que siàia l’ora, degun venia parlar jamai a la chinesa, pensatz be, una fliquessa, li dissetz quò-quí o quò-laï, ‘la compren quò que ‘la vòu. Quò seriá bon per aver de las istòrias.

Mòrt d’una femna dins un ostel de La Rochela

Fach divers – lu 4 de novembre per charantaliura.fr e AOP.

Una femna d’una quarantena d’annadas es estada trobada mòrta dins ‘na chambra d’una petita ostelaria dau quartier de la gara de La Rochela.

La femna, que l’identitat es pas d’enquera coneguda, eriá venguda se pausar lu temps de la Tots-Sents. Sabem nonmàs que ‘la es arribada divendres ser per lu tren. Una vetz dins l’ostel, ela ‘guet pas l’enchaison de desfar sos bagatges que un (o daus) agressor(s) tombeten sus lur presa, per la tuar quauquas minutas apres.

Es ‘na paucha que prenia son servicí lu dimenc mandin que trobet lu còrs. Los secors rapidament sus plaça pogueten màs constatar la mòrt.

Una enquesta es estada duberta per ne’n saber mai sus quel afar. Mancarem pas de vos balhar la sega.

_____

« ‘Quò vai, ilhs brodeten pas de tròp per una vetz » se penset l’inspectritz. Ela tornet un pauc sa chiera per ‘viesar un basteu apres manobrar dins lu pòrt. Quò fasiá bon per se permenar sus la mar.

Apres un temps de pausa, ela damandet un second grand càfe e continuet la legida dau jornau. Pas grand chausa en defòra de las vacanças que son ‘chabadas, las classas netiadas lu temsp daus congiers, daus bilhets sus las flors dins los cementeris, mai flurits en quela annada de centenarí de la Granda Guerra. Ela faguet un pauc mai atencion sus la politica mai quel afar de faus policiers que foten la marda chas los manifestants. I avia un reportatge a charja jaspit d’un site internet tengut per un jornaliste dau Monde©. De segur, las fotografias laissavan pauc de plaça au dobte. Totjorn dins la tireta politica, los faissistes dau movament Auba Daurada de Bordeu avian tentats una accion comuna emb daus nacionalistes de Peitieus, daus identitarís de Lemòtges e de Clarmont per reclamar la recreacion de l’Aquitana romana dins lu cadre de la novela refòrma teritoriala. Bordeu, Peitieus, Lemòtges, Clarmond, lu carrat d’una Aquitana granda que son unitat eriá tirada de la conquesta romana e que los d’eistrema drecha eimatginavan coma lu punt de despart de la reconquesta de la puretat sos lu slogan de la puretat de la terra faça a la mondialisacion. La Silvana essaiet d’identifiar los qu’erián sus la fotografia mas la qualitat eriá pas de las melhoras. ‘La passet vista per pas s’esmalir, ela que de per son istòria personala s’eriá jamai trobada a sa plaça, afe, a la « bona » plaça que los amators dau mostachut chaussissián per ela. Es entau que lu caracterí de « la chinesa » passava per meschaënt, en vertat, eu s’eriá farjat sos las eprovas de la vita. Quò li fariá pas plaser d’i aviesar un agent de son comisariat, o un ancian de l’escòla de poliça. Autant las petitas connarias jamai be finas, ‘la passava, dau bole de ris per sa prumiera annada a La Rochela a la legenda que ‘la minjava dau chen, mas faudriá pas iò far tots los jorns. Afe, i a p’unas rasons que la poliça siàia mainatjada per la distribucion de gros colhons.

Tres goiatas a la taula de costat fasián daus comentarís sus l’afar de la femna.

– Ma mair me diguet que la fagueten tornar coma ilhs fans dins las cavas…

– Me dise que fau far ‘tencion.

– E es dins ‘quel ostel.

– Dins lu quartier de la gara, son pas daus palaces.

– Aurian pogut la tuar…

– Mas ela es mòrta.

– Aviá pas sasit, qu’es òrre de morir per la Tots-Sents.

– Qu’es òrre de morir… Bon, i vam, i a eisamen d’italian a dietz ora.

L’inspectritz se levava ela-tot per paiar que lu medecin ‘ribava.

– As lu temps ?

– As de las chausas novelas per me ?

– Un càfe se’us platz.

– Un grand ?

– Non, un pitit, sens sucre.

– Qu’es per me… Donc !

– Res de mai. L’analisa chimica indica be la natura daus gants, mas nòstra femna es pas mòrta estranglada per ‘quelas mans gantadas.

– Òme, femna.

– Daus dets grands e fin, beleu un o una pianista ?

– E la bilha de veire ?

– Lu veire es un materiau farjat de silicium, tirat dau sable, generalament transparent.

– Espofidada de rire.

– Perque venguet pas ier au ser ?

– Eriá bracada. La Rochela – Sent Junian – Sent Junian – La Rochela dins la jornada, per veire ‘quela tipessa leva-nas, petita borgesa que pensa que viure a costat de París fai d’ela un estre eistraordinarí.

– Poviá pas daissar tos òmes lu far.

– I a un quauquares que me manha dins ‘quel afar.

– Qu’es lu chanjament d’ora.

– Chaçatz lu banturle per la pòrta, eu s’entorna…

– Eiscusa me !

– La tipessa eria pas presa per asard ?

– Non.

– Resta de trobat la blonda aus piaus longs.

– Avetz son nom ? Sa fotografia ?

– La fotografia de l’ostel es pas pró bona, um vei pas sos trachs finaments Pertant a la desbuta i cresí. I a que son nom, mas per aura las charchas sus Esgolesme e los barris balheten grán res. Fau ‘pelar la gent, contròtlar. Apres Coma quò se passet dins la chambra, misteri. Es quò ela que tuet ? Entretz ela dins la chambra que la mòrta l’eriá desjà e que ‘la prenguet paur.

– La vigueten pas surtir ta blonda ?

– Non, ela es passat per la surtida de secors. La camerà es màs per l’intrada e mai-que-mai per dubrir a distança quante la gent a pas lu codí. Quò qu’es pas mau fach coma sisteme. Dins l’ostel i a pas de susvelhança, pensa be, lu sos prefect o lu mera que serián filmats mai ‘na maitressa.

– Daus policiers o de las policieras.

– E quauqu’unas mai un medecin legiste. Te fau ‘restar de legir daus libres e viure dins la realitat.

– Pertant, faguetem be entau en Còrsa.

– Eriám en vacança, qu’es pas parrier. Quite de parlar cultura, quò te ditz de venir coma me a la fin de la setmana a la meijon dau Japon a París ? Sabe pas perque, crese que lu quauquares que me manha es alaï.

– Perque non, paiarai los bilhets, te daisse paiar lu pitit desjunar. Siàias jamai suspresa un jorn de peschar mon còrs dins lu pòrt.

– ‘Resta te.

– Bonjorn Guil… perdon, bonjorn inspectritz, bonjorn doctor.

– Alan, ne’n setz d’enquera aquí ?

E tots tres riseten de bon cur.

– Semblatz uròs mon Alan.

– Vene de ‘chabar un dau libre dau Mastsumoto. Sabetz, lu tipe dau papieron qu’eriá dins los afars de la mòrta, lu tipe de l’erpausicion de París, qu’es un escrivan japones. La mediateca poguet pas me prestar « son » libre lu mai conegut, « Tōkyō express ». La tipessa de l’arcuelh me’n parlet coma d’una istòria de pas creire que lu tuor aviá pres un tren davant de la gent avant de ne’n descendre dès qu’ilhs torneten la testa, aquò per prener lu tren sus lu quai en faça e anar tuar lu monde.

Prenguí « La votz ». Un libre que tot parrier parla d’un tuor dins los trens, puei anguí a la gara per prener tots los orarís daus trens París Montparnassa – La Rochela, de la poncha dau jorn a la nuech negra, coma i aviá un tiquet de tren dins sa vesta. Khurram es apres analisar la probabilitat de ne’n prener un, puei davalar per ne’n prener un autre. Ò sabietz que quò costava mai de 100 € 00 per anar a París. Qu’es pas balhar lu tegeve.

– Me songe qu’atz perdut vòstre temps, lu tren es direct.

– V-òc-es mai per l’aver fach un còp per anar chas una amija a Lion, podetz prener un bilhet sus ‘na distança granda venduda coma directa mas dins la realitat, lu tren se ‘resta un o dos còps. Per eisemple París – Milan, ne’n Italia, còsta la meitat dau pretz qu’un París Lion. Adonc, preniá un tren per Milan mas me ‘restava a Lion.

– Atz quantben d’amijas dins lu païs ? Un vertadier femnelaire, mesfiatz v’autres daus marrits gelós. Una bala perduda qu’es vista fach.

– E qu’es me lu legidor de roman policier. Afe de far entau ai esconomisar de la moneda.

– Fau be de la gent per paiar lu comitat d’entrepresa daus chaminòts.

– Qu’es v’autres que disset de las chausas entau. Afe, la tipessa me metet de biais l’autre libre, mas desjà me songe que lu qu’ai pres m’aigulhet sus los bons ralha.

– E dins lu tren, pensatz que la Anna encontra son tuor dins la veitura bar ? Dins un compartiment ‘la vei una tipessa se far estrangliar, la crida, lu tuor la menaça de sabe tròp que e quante ilhs ‘riban a la Rochela eu s’acata dins sa valisa per la tuar mai ‘na bilha ?

– Son tuor, ne’n sabe res, mas ela eriá dins lu mesma tren…

– …que son òme. Alan, setz un òme engenhós.

 

nanowrimoc

~1 590 mòts per ‘queu bilhet, quauques 15 190 sus los 50 000 damandats
(35000 sirán ‘na reüssita de mon punt de vuda)

_____

  • Lu site dau NaNoWriMo (>en)
  • Le site pour les francofones, phranquophones, pardon, les francophones (>fr)

Publicités