Lu vent torna bufar – MIYAZAKI Hayao

L’istòria es la dau Jiro que raiba de volar mas eu a meschaënta vuda, ‘laidonc, eu fará lu constructor daus avions, coma lu Giovanni CAPRONI. Jiro es tant engenhós qu’una vetz embauchat dins ‘na societat aëronautica, eu devendrá l’un daus pus grands cerveus de son temps.

Lu filme conte ‘n’istòria v’raia e sem dins l’istòria d’un Japon nacionaliste, dins lu biais de comptar daus japones, sem apres la restauraci’ Meiji (1868-1912), es de dire dins las priòdas Taishô (1912-1926) e Shôwa (1926-1989). Eu pren son trabalh au momint dau grand tremblament de terra dau Kanto (ente se troba Tôkyô) ne’n 1923, eu coneis la crisa, las malaudias e lu filme nos mena d’aici la seconda guerra mondiala.

Sem dins l’epòca ente lu Japon eriá apres ‘chabar de correr darrier los d’Euròpa quite a far pieg dins l’imperialisme, e es dins ‘queu sens que visem lu Jiro ‘nar dins l’Alemanha nazi, per aprener dins lu domení de la technologia.

Sa formaci’ ‘chabada, eu eimagina çò qu’eu pensa estre lu melhor avion de guerra, e tant lu dire, l’eimatge ment pas, perque còp-sec apres ‘quela reüssita, ne’n vesem la resulta.

Un bon film, mas pas un chap d’òbra, e mai-que-mai pas un filme per los goiats.

Publicités