Gerontofilia

‘Tenci’ parle pas aquí de mas perverci’s a l’encontra de… parle nonmàs d’un filme.

Gerontofilia conta la vita d’un jòune òme, lu Lake, que a per p’ita amija la Desiree. Emai los dos semblessen los autres jòunes vilauds dau jorn d’aüei, sembla que quauquas escladuras van per s’ubrir d’enquera un pauc mai. Lu Lake passa sos l’enchantament d’un vielh òme que abita la meijon de retirada ente eu trabalha.

Es un filme dau Bruce Labruce, un realisator « cavareu » per pas dire « underground », dins lu mitan gai e pornografique. Sos prumiers longs metratges fugueten « No Skin off My Ass » (1991), « Super 8 1/2 » (1994) (los ai totjorn pas vuts), puei, « Hustler White » (1996) que conta la vita d’un jornaliste que mena un’enquesta sus lu mitan de Los Angeles ; ‘queu filme fuguet censurat dins un prumier temps per de las scenas ubertament pornograficas e sadò-masòs.
Eu torna apres un autre filme « Skin Flick » (1999), sus ‘na tematica propría a se, puei « The Raspberry Reich » (2004) que tene per un chap d’òbra malgrat las scenas pornograficas ; es l’istòria d’un grope de teroristes que son per far ‘na revolta contre l’eterocentrisme ne’n capturan un filhon a papà.
De se ai maitot vut « L.A. Zombie » (2010) que longtemps ai pres per un film pornò, per la bona rason que i a màs daus actors pornòs° que jugan aquí dedins.

Dins lu darnier filme dau Guiraudie, i a via desjà ‘n’istòria que boirava la jounessa e la vielhessa, e aquí, ‘guí un pauc paur d’aquela encontra per saber que lu Labruce enfaça aisament las scenas seissualas. Mas non, res de frontau, tot es dins ‘na granda minhardessa e es l’istòria d’amor que nos es contada, res mai.

Es filmat mai ‘na granda pudor e los actors tant lu « vielh » òme Peabody ~ Walter Borden, un tipe d’una granda cultura, d’una granda elegança, tant lu goiat, Lake ~ Pier-Gabriel Lajoie, que sa faça es d’una eisprissivitat genta mai un pitit sosrire totjorn aquí, i son grandament dins la resulta. Aquò sens obludar los seconds ròtles, tant la p’ita amija, Desiree~Katie Boland o la maïr, Marie~Marie-Hélène Thibault.

Un bon filme, de veire per far faça aus prejutjats.
Es de nòtar que lu film boira la linga francesa per 25~35 % de bana coma l’anglesa 75~65 %.

 

 _____
° que un daus actors se poriá trobar « occitanisat » a la mesma vitessa que lu Lavillenie lu jorn ente los occitanistes se pensaran « coma tot lu monde » e non pas « ‘n’enja particuliara ». Dise quò-quí perque l’un eisisset a Cognac (16) que le second a Barbezieux (16) e lu jorn que lu Lavillenie sautet tant ‘naut eu se trobet per la graça dau nacionlisme, « occitan ». Me songe que l’autre devriá iò estre maitot perque sabetz per davant coma per darrier, las sautarias son son afar.

Publicités