Tres receptas mai una

La prumiera es la de la coja de l’espaça. Migretz pas, es pas de la dròga, ‘na conaria nimai, es nonmàs un boiradís de 4 espiças. Lu nom « coja de l’espaça » es ‘na virada dau nom que l’i balhí ne’n frances. ‘Queu nom ven que, lu prumier còp que ne’n auviguí parlar, non pas comprener « pumpkin spice », comprenguí « pumpkin’s space » ;  sabetz que sei pas fòrt dins la linga dau Shakespeare. ‘Laidonc, non pas la ‘pelar « 4 épices », que vòu tot dire e res dire, gardí mon error, ne’n faguí mesma ‘na seconda ne’n parlant de « citrouille de l’espace », e non pas de « d’espace de la citrouille ». Veiquí, v’autres sabetz aura.

Per iò far, fau :

  • 5 culheras de canela (~50 g),
  • 2 culheras de muscade (~25 g),
  • 2 culheras de gimgembre molinat (~15 g),
  • 2 culherons de piment de Jamaïca (autrament nomat :  » 4 espiças  » o  » buecs d’Inda « . ‘Quò se trobar dins las espiçarias de produchs sens pesticide o chas lu despanor mai conegut sos lu chafre « l’arabe du coin ») (~10 g),

Dins un topin, boiratz tot aquò e servatz iò dins un topinon que barra be.

‘Queu boiradís pòt estre usats dins lu pan, los gasteus, la compota, las confituras… mesma lu tè. ‘Tenci’ de pas tròp ne’n minjar se v’autres atz los budeus que se desviran aisament 🙂 o se avetz lu fondament, per restar minhard, lu fondament ne’n porcelana.

Sabetz que mai d’una vetz me fau cosinar per de la gent qu’an paur de s’enuiar dins la vita, ‘laidonc, se farjan daus clidons que los autres per ‘ver de las relaci’s socialas coma ilhs (e elas), los autres son forçats de dubrir la clida, es de dire « de far màs « per ilhs (e elas) » ». Per eisemple, se passar dau gluten (parle pas aquí daus alergiques per causa de malaudia). Perque, v’autres iò sabetz beleu pas mas lu blat, desempuei los prumiers agricultors, per se protejar daus òmes e de lurs utilhs, renforcet de se-mesma sa p’ita còca, e ‘quela còca dura, lu son, ‘na vetz dins los budeus, vos fai petar, pardon, vos balha dau mau, e lu Mau, sabetz, lu MAU qu’es lu grand mau de nòstra epòca es que pus degun vòu sufrir per viure (ne’n parlarai dins un bilhet apres ‘ribat)… aürosa societat ente vivem.

Faça a dau monde entau, los minja-raiças, non pas ilhs, ne’n fase pertit, faça aus Jan-maniacs, ad un eu-minja-coma-‘na-chabra, fau que la cosina tradicionala s’adaptesse per pas crebar, per eisemple los galetons mascarats ne’n blinis :

  • 250 g de farina de blat negre
  • 150 g de farina d’epautre
  • 1 sachier de levura chimica
  • 1 culhera d’òli
  • ‘Na grossa culhera de mostarda (d’aquela dicha « anciana », la mai las granas)
  • ‘Na pinçada de sau

Boiratz las farinas, mai la levura, la sau, puei la mostarda e l’òli. Ajutatz de l’aiga d’aïci ad aver ‘na pasta lorda, epaissa.

Dins ‘na padela, botatz un pauc d’òli per la graissar, ‘lumatz lu fuòc e quante ‘la es chauda, gietatz ‘na locha de la pasta. Laisstz cueire 2~4 minutas, tornatz lu crespon e daissar cueir un còp de mai.

La pasta se fai ne’n 10 minutas, per 10 crespas fau comptar ‘na bona demiei-ora, apres, la gent son de dire que cosinar pren dau temps, afe. Podetz iò far mai 50 g de farina de chastanha de mai, e perque pas, la meitat d’un culheron de coja de l’espaça.

‘Quelas crespas espessas son de minjar a l’eperitiu fredas e copilhadas au cairat, mai ‘na tapenada, un pesto, dau formatge. Son de minjar chauda per acompanhar ‘na salada per eisemple. Emai i aguesse de la mostarda, ‘las son bonas mai de la confitura.

Totjorn per los minja-raiças, e mesma per las dau vegetalistan o los de vegania, los porrats au lach de còcò. Fau :

  • 3~4 blancs de porrats copilhats ne’n lamelas.
  • 200 ml de lach de còcò (lu lach ven dura, fau metre lu jus mai la fòrma de burre)
  • De l’alh, de la sau

Dins un wòk, fasetz chaufar lu lach (lu jus mai lu burre), puei ajutatz los bocins de porrats, la sau e l’alh. Cubretz per iò far cueire 15 minutas « a l’estofat » (pòdetz dubrir per visar que quò brutlesse pas, dins ‘queu cas, boiratz e ajutatz un pauc d’aiga).

Apres, pòdetz ajutar mai d’una chausa, per eisemple daus fruchs secs tipe abricòt, rasin, figa, de la fruchas de sason tipe pomafruch, pera… pòdetz maitot cassar ‘n uòu o ajutar la meitat d’un culheron de coja de l’espaça.

Lo pan de chastanha (cuech vapor). Afe, ‘na fòrma de pan, mesfiatz v’autres, es pas ‘na recepta « gluten free ».

  • 200 g de farina blancha o d’epautre
  • 100 g de semoula
  • 100 g de farina de chastanha
  • 1 paqueton de levadura chimica
  • 40 cl de jus vegetau coma lu de sojà, d’òrdi…
  • 6~8 culheras d’òli d’oliva
  • 1 culheron de sau

Dins un topin, boiratz las farinas, la semoula, la levura, puei lu jus, l’òli e la sau. Boiratz iò 5 minutas.

Graissatz un topin de terra, o prenetz un mòtle d’aquelas matieras sinteticas, versatz i la pasta. Cubretz d’un filme plastique per cosina e metre dins un panier dau cuech vapor 50 minutas de temps (segond lu tipe, fau adjustar lu temps per cueire).

‘Na vetz cuech, daissatz fredir avant de minjar.

Aquí maitot coma totjorn, podetz metre daus fruchs secs (amenla, nosilha, notz…), de las fruchas sechadas (figa, pruneu, data…), ou daus bocins de pomafruch, un pauc de coja de l’espaça.

  • E obludatz pas d’anar fusinar dins las tiretas dau caier « Recèptas del País e d’endacòm mai » (>òc), n’i a per tots los gosts.

____
E dins quauques temps, son las elecci’s. Per ne’n rire un pauc, e perque parle aquí daus minja-raiças integristes, veiquí ‘n eimatge.

Sus municiplol (>fr)

_____

Minjatz màs dau tofu besilha lu cerveu es lu perque aime mielhs far la tota-fòla…

Publicités