Dos filmes per un cine-club

‘Queu bilhet es clafit de « galicisme », mesfiatz v’autres de pas chaulhar la vòstra vuda. Quau que siàia, qua’iment tots los mòts son estats verifiats de se trobar benaise dins :

  • « Dictionnaire Français-Limousin » dau Michel Tintou (2006)
  • « Dictionnaire normatif Limousin-Français » dau Gérard Gonfroy (1975)

Apres, ‘tende los diccionarís daus normaupates subvencionats (e lur feminin)… De segur que d’escrire aquò fai de me quauqu’un que sur-valorise l’escrich papier sus la besonha numerica e quauqu’un que se pren pas per ‘na marda, mas, n’i pòde grán res, es dins la natura daus lemosins, ‘na fòrma de karma, un eime « especiau » qu’an pas lo-a-s occitan-a-s.

Autradament es un bilhet per parlar un pauc dau cine-club.

Les hauts de Hurlevent – Los nauts de Quò-li-bufa

Un filme (2011) de la Andrea Arnold tirat dau libre de la ‘Mily Brontë (1847).

Heathcliff, un goiat perdut es pres chas se per Monsur Earshaw, ‘n òme que demora sòu dins ‘na ferma escartada, sòu mai sos efants, Hindley e Cathy. Sens tardat, lu Heathcliff se troba faça a la violença jalosa dau Hindley, mas, lu jòune garçon es protejat per la Cathy, la goiata coma laquela las chausas se passan mielhs, mai-que-mai au mitan d’aquela natura austera, de rochiers, de pluiea e de vent.

Vau pas vos contar de las cracas, ai pas legit lu libre, e, es la prumiera adaptaci’ dau roman que vise, justadament, a la desbuta qu’eriá per m’eschivar la pena d’una legida… Tant iò dire lu filme es beleu un pauc long (2h00), brave dins los eimatges de la natura. Los actors son fòrça bons per montrar las passions umanas, passions que van d’aïci l’obseci’, vertadiera angoissa contunhala de l’un vers l’autra.

Dau mesma biais, ‘quò me balhet pas l’enveia de legir lu libre, que podetz descharjar aquí (>fr).

0(O!°)0

Killer Joe – Jan lu tuor~Joanò© lu tuaire

Un filme (2011) dau William Friedkin sus un scenario de Tracy Letts tirat de sa pèca de teatre (1993)

Chris, que fai lu revendor de dròga, deu se despachar de trobar 6 000 $ per pas crebar ‘vant l’ora. I a ‘na possibilitat dins l’assurança vita de sa mair que ven de lu botar defòra. Mas per 50 000 $, fau pas far far lu trabalh per un banturle. Eu entendet be parlar d’un de la poliça que la nuech ‘ribada fai ‘quela sòrta de besonha, mas eu iò fai pas per res, e lu Chris n’es riche que d’una jòuna sòr.

E be pitits, sabe pas tròp se deve dire d’anar lu veire. Es un film negre, que laissa la plaça a tots los codís dau genre : personatges paumats, embraulhadís que van contunha, malastre dins la reussita…

Au mitan de tots ‘quilhs clichats, inversats per ne’n far veire lu refolament, sem surpres de sosrire, de rire, de rire franchament, e de las vetz jurt’apres ‘na scena òrra.

0(O!°)0

Publicités