L’ora daus bilançs.

Es la fin de l’annada, l’ora de far la balança dintra ‘quò que 2013 menet de bon o de meschaënt, que « cal pas que los limosins escriguèsson aital » coma iò disset l’autre, afe.

Per mon perron, qu’auriá pogut estre mielhs, mas sei pas aquí per me far planher, i a pus malaürós que me.

Dins lu meschaënt  :

+ un amic d’enfança se troba beleu andicapat d’aici lu restant de sa vita a la sega d’un accident de VTT,
+ ‘n’amija desbutet ‘na quatresma chimiò,
+ un collega au trabalh es renvoiat,
+ lu luòc autò-gerat es barrat,
+ l’AMAP que se ‘resta,
+ ‘quela colha de Canabís Desverdida, militanta sindicala qu’envoia « sa » letra velcròesca, afe, fau be que tornessen s’ocupar las despressivas de l’educaci’ nacionalista…

E dins lu bon :

+ Ma granda ‘guet 100 ans e sei totjorn pas bon de maridar,
+ ma novela becana es estraordinara,
+ un libreton e un teste per un concors,
+ quante tu surises ad una flor, la flor torna te surire…

Bon, sabe pas tròp d’enquera quò que 2014 vai far, eispere nonmàs que ‘quò ‘nirá mielhs frau que brau.

Setz pas sens saber que los bilançs ad aquela epoca de l’annada venen coma las cròtas a la bica, coma lu cusson au porrat. I a lu pritz de la prima d’assurança la pus gròssa e la pus stupida, aus Estats Units, los Gerards© per la televicon, los pritz de l’architectura dins ‘na perpectiva loja-maçonisca, per eisemple lu Fukushima Center (Fukushima Radioactivitat Activitat Center , lu FRAC persenta « Flatulença – l’art daus cròs dau cuòu ») …

I a d’annadas de ‘quò, dins la cibercaiernofèra d’òc, dins ‘na galaxia luenh-luenh, s’eriá organisat ‘na fòrma de remisa de pritz, a l’oposat de mos perpaus percedents, per balhar de l’eime aus blògs d’òc. Vòle pas tornar ‘quilhar de’n pès ‘na chausa que s’esbolhet beleu de pas estre pro solida sus sa basa, mas, veiquí mon tòp :

masfenestrasdoc

Dins la seria « informaci’ » : ganha lu Jornalet (>òc-cat) contre Rua89 (>fr) e Slate (>fr-en), fau dire que trobar de l’informaci’ ne’n òc es pas aisat. ‘Tenci’, parle aquí d’informaci’s, pas daus tracs sindicaus per los pròfs (e pertant sus lu site primat, se son pas obludat-ada-s…).

masfenestrasdoc

Dins la seria « portau geografique » : ganhan Lemosin punt net (>lm) e Gasconha punt com (>gsc-fr) ad egalitat, emai ‘guesse ‘na preferança per lu lemosin. Ganhan contre daus sites farjats per de las instituci’s qu’an pas mestier de se veire far de publicitat per un trabalh que son paiar per iò far, quò vòu pas dire que lu trabalh es pas bon.

masfenestrasdoc

Dins la seria « ‘nalisa, critica e cultura » : ganha Mescladís e còps de gula (>fr-it-òc-lm) contre degun¹, perque eu es tot sòu dins ‘quela categoria. ‘Na menci’ especiala per lu site dau Jacmes (>òc), mas la tonalitat quauquas vetz, paubres que paubras, sens obludar que i a tròp de videò e que ‘quò fai plantar l’ordinator… afè, fau ‘nar los legir, los dos, quau que siàia.

masfenestrasdoc

Dins la seria « filmonet reportatge » : ganha 7@Lemòtges (>fr) de bana coma los e las de l’IEO dau lemosin (>òc). Per tot dire, coma sei pas militant occitaniste, sei quitament pas occitan, sabe pas se d’autres o d’autras fan de las chausas entau. Me pense que v-òc-es dau costat de las valadas italianas, mas sei pas segur.

masfenestrasdoc

Dins la seria « cibercaier blòg joèb » : ganha… afè ganhan… la Mela (>òc) e lu Joan (>gsc) perque son daus tròps rales blògs actualisats reguliarament, que los bilhets son autra chausa que lu comunicat d’un’associaci’. Menci’s specialas per la Patricia (>òc) que ten un jornau regulier e per la Merike (>cat), que son blòg es l’un ente aime me pradelar, emai comprenguesse pas totjorn quò qu’es escrich.

masfenestrasdoc

De segur, i a d’autres caiers, e querraque dau monde que trabalhan dessus, son beleu pas dins la lista perque los coneisse pas, aquò chanja res a las qualitats de lur trabalh. E d’enquerra ‘na vetz « facebook, twitter sont les McDo de la pensée ».

Dins la seria « Jan « que cal disir Joan » per pas far purar las verjas, ‘laidonc Jån la critica » : ganha la Rapieta (>lm). Que ‘queu-quí, sabetz, per visar lu monde desempuëi son embonilh, eu sap far, mas, per perpausar, construdinizir, participar, quilhar de’n pès, bastir quauquares, i a pus degun.

Que lu trapesse ‘queu planta-porrada, ‘queu minja raiças mai sa becana e lu farai davalar de sa montanha de Beauça, ‘questa saloparia de bò-bò-biò-biò, eu ‘restará mai sos pitits monts de Blom (>fr) que serián lu centre dau ‘nivers, rapelatz v’autres.

What Others Think of Me is Not My Business… Anymore ! ²

Vos fase graça de ma reconaissança eternela.

Continuatz entau, lu chamin es pauc clar traçat mas de lu segre, n’autres vam pas nos pardre.

_____

¹ pas lu Degun qu’escrís de la vetz dessus. La bela recursivitat que quò seriá perque normalament, lu contenant pòt pas s’oposar au contengut, la topin pòt pas ‘nar contra las chastanha, emai ‘quò siguesse lu vide dins la porta que fai passar lu margaud ; los occitans son beleu fòrts mas queraque pas pus fòrts que lu Taò-Te-King.
² Mesfiatz v’autres, ai legit màs la meitat dau bilhet, promete pas d’estre de banna coma tots los eivís conhats dedins.

_____

E a l’an que ‘riba !

3 réflexions sur “L’ora daus bilançs.

  1. Melania 30/12/2013 / 11:25

    Mercés la Rapieta!!!
    M’as fotuda exaequo amb lo Joan dau Peiroton, sèra content lo tipe;) (emai o aguèsse pas dich dins son comentari la puta)
    Lo poton e a l’an que ven!

    J'aime

  2. tavan 30/12/2013 / 08:40

    ganhar quora i a pas qu’un concurent, aquò rai !
    mercé tot parier
    bona fin d’annada a la rapieta e a totis,
    lo tavan, de Mescladis e còps de gula

    J'aime

  3. Joan Peiroton 30/12/2013 / 07:00

    Mercés peu message e mercés peu compliment! E que sàpias que quitament se te deisham pas tròp de comentaris, te legem regularament. Bonas fèstas de cap d’an! Longa vita a tu e au blòg!

    J'aime

Les commentaires sont fermés.