La davalada es ‘quí ‘ribada

La davalada es ‘quí ‘ribada mai sos modelons de p’itas fuelhas, dins las ruas, los chamins e chas lu merchand de papierons.

V-òc-es, un lirisme de basard per ‘na revuda que merita mai qu’aquò.

La que fai la davalada es la Revuda Dessinhada : daus jornalistes, daus autors de banda dessenhada, e aquò se conjuga un pauc au feminin, tota ‘quela gent per mai de 220 pajas de reportages, d’eisplicaci’s dau monde, sus ‘na mòda grafica.

Segur, es pas la prumiera vetz que quò se fai, la darniera nimai, mas per lu momint es la noveutat dau talhis daus móuqs°, lu talhadís daus meitat-magasines meitat-libres.

Quò s’i parla daus gases de schiste, daus ‘limauds darrier las clidas dins los parques d’animauds, de la vita daus jòunes agricultors, daus musicians… per far cort, es ‘na revuda que los sugiers son variats.

Apres, n’autres am daus sugiers, daus autors de dessinhs coma lu Gipi, lu Vandermeulen o lu Stassen per los que coneisse, màs sei pas un especialiste. Manca beleu un punt de vuda mai afirmat « totas las vetz ». Non pas « un sòu punt de vuda » per la revuda dins son entieretat, es pas lu Monde Diplomatique ne’n bede, mas dins las istòrias contadas, de las vetz, es pas pró clar. Tant la sus los agricultors e son « ne’n saber mai », lu punt de vuda es clar, tant lu bilhet sus l’economia es pas tant clar qu’aquò, mas ‘quò pòt ‘ribar. L’istòria sus los alimauds me faguet petar de rire, un EDR tot sòu dins lu tròquet, coma un banturle ; coma es Jan-la-critica qu’escrís aquí, eisplicar que se los umans ‘vian pas tot esbolhats dins « los abitats naturaus » i auriá gaire besonh de parque per servar quauquas espeças auriá machat degun.

Es un prumier limerò, e per lu momint, ne’n fase la propaganda, mas dins un an, aurai beleu chamjat d’eivís ; ‘pelatz me lu molinier sus la una per saber d’ente quò bufa.

  • Lu site (→ fr) , sans oblidat que quò es ‘na revuda « conectada », ne’n mai daus tialadís sociaus, la legida se pòt far sus la tableta goldenisada.

_____

° móuq o mook coma ò disen la gent daus medias (→ fr) de París mesma sus França Cultura, mesma, mesma, me damande ente n’autres vam, un móuq es ‘na revuda ‘bilhada coma un libre.

Publicités