E d’ente ‘quò ven ?

L’autre ‘vendres, teniá la permanança dau luòc autò-gerat, lu luòc ente i a de la gent coma la V. (>lm), teniá la permanança quante un tipe niure, pas un joiós banturle, un sadolard entret per beure un còp.

I fase la remarca qu’eu es pas tot sòu, e que ‘laidonc, coma n’autres sem pas soladament un bar mas un luòc associatiu d’inspiraci’ libertaria, vòle res i balhar. Fau far viure los vertadiers bars dins la rua.

L’ivronha còp-sec me traitet de faissiste, forçadament, e que dins un bar anarchiste, aquò es pas de creire, e tolutotun. Ne’n mai d’aquò eu m’eispliquet qu’eu ò sabiá qu’eu eriá pas tot sòu perque qu’eriá son aniversarí e que coneissiá res a la vita.

Li tòrne dire que qu’eriá pas d’aquela companha que parlava. Lu tipe se metet de rire e tornet comandar.

Me, res.

Emai siguesse pas ‘na fòrça de la natura, aprenguí a restar suau faça ad un cas sociau. Adonc, lu sadolaud se metet de parlar, de parlar e desparlar. Coma eu eriá pas meschaënt de tròp, lu laissí far. Ad un momint, eu me parla de sa filha e de l’educaci’ de la goiata.

Forçadament, qu’eriá pas contra me, coma n’i coneisse res, mas, es un fach reconegut dins la vila de M** sus L** que sa filha es ‘na surdoada, beleu be ‘na futura farfadela, marchatz saber !

Sabe pas dau quau costat aquò ven ? Dau meu o beleu de la soá mair, mas nòstra filha es ‘na goiata engenhosa. Per eisemple, a l’escòla, ‘la se fasiá chiar coma los eifants de son atge. N’autres la menetem chas los specialistes avant de saber, e per comprener maitot. E be, aüei, ‘la passa dau CM2 d’aïci lu CM1. Es dire que ‘la es surdoada. Aquò deu be venir d’un costat.

Segur, ‘quò deu venir d’un endrech.

-!-

Publicités