Didier Lestrade « Pourquoi les gais sont passés à droite »

Lu Lestrade, après ‘ver trabalhat a Gai-pied e Libération, fuguet l’un daus fondators d’Act-up (→ fr) o d’enquera dau jornau parisien Têtu (→ fr). Es ‘na persona granda dau mitan gai e coma ‘queu-quí aima res mielhs que fisar que fisa son monde, de las vetz se tròba aborrit coma la marda qu’atz marchatz dedins. Fau dire que tustar per aquí, conhar per alai e se ‘bilhat dau vestit de la vertat incarnada es pas la garantida d’estre aimat, subretot dins ‘na minoritat.

Tròs pitit per estre ‘na vertadièra enquesta sociò-analitica sus los vejaires daus gais, tròp grand per estre un article jornalistique, m’es ‘vís que ‘queu libre pastís de sa talha jurta bona per far s’esbramelar quauquas personas dins París-lu-Marai$, cridar sus quauquas palhetas, pas pro per balhar ‘na secoduda francha e far se questionar.

Pertant, las desbutas d’analisas, e de las bonas, son ‘quí quilhadas coma de grandas branchas, manca des las far frutjar per las veire flurir sos la fòrma d’una bra’a arocana.

Quauques punts per soschar :

– « La França » persuadada de sa superioritat republicana faça au comunautarisme.

– Coma l’estrema drecha dau nòrd de l’Euròpa reussiguet a prener per chap daus gais, Pim Fortuym o Geert Wilders. Perquè n’i a un grop « gai » de bana coma l’UDC ne’n Soïssa* ; la paur daus « musulmans » boirada a la seducci’ operada per lu chap daus jòunes** eisplica pas tot, subretot pas lu silencí daus « gais professionaus »***. E es parrier sus los afars manhan daus gais coneguts, silencí dins « París-lu-Marai$ ».

– Lu nacionalisme de quauques gais de « França » qu’obludan aisidament la tauvera « internacionalista » de la nòstra comunautat, ‘na pertida indesboitonada de l’identitat gaia.

– La pensada normativa de gent « ‘ribats » dins lu « medialogos » coma la Carolina Fourest o b’etot lu Josef Macé-Scaron que tòst a la cima d’un pitit poder, fan res de res per aidar, après ‘ver usar de la comunautat per montar. Franc d’aquò de la gent « bi-nacionaus » coma lu Alex Taylor (→ en), o d’autre dins lu spòrt.

– L’imaginarí colonisat per la chadena de la consomaci’ que montra ‘na realitat que beucòp ne’n son pas e mai d’un còp fòrça eslunhats.

Segur, es pas totjorn per plare, d’autant mai que pense que lu Lestrade se creu escrir quauquaren coma ‘na fòrma de « escota pitit gai »****, mas coma ‘quò part de fòrcha ne’n carfòrcha, es pas clar-clar. Eu pensa, e es un rare de ne’n parlar, au bonur e a la libertat, que per un jòune quò será totjorn pas aisat de surtir dau vassalier se los qu’an lu poder iò fan pas.

 Es en quò que Lestrade a un eime comunautarí e que fau lu legir.

* veire la revuda 360° (→ fr).
** ‘queu-quí per un referendum sus las armas, pauset nud, un fusilh au mitan de las chambas.
*** e vos contarai pas ‘quí ‘quò que me diguet un militant « d’omosessualitat e socialisme » (→ fr) sus lu biais de « dondar los gitans ».
**** « Écoute petit homme », un chap d’òbra (→en) de W.Reich

Picatz l'eimatge per legir lu Lestr♥de dire 'quò queu pensa dau Delanoë 😉

 ‘Vant de balhat los liams, tòrne un pauc sus mon embonilh comunautarí, segur de bana (→ òc-gsc) coma la sinhificaci’ que ne’n fai Lestr♥de e non pas coma quò me’n fitet fach la croçada per lu regent dau fòrom daus dreits umans, perdon lu socialiste plaçat ‘quí per balhar la moneda a los que fan lur propaganda. Veniá de parlar de la Julia Maroch. Mon perpaus portava sus « femna, autritz de bede, Belgica ‘laidonc mauconeguda ne’n França », ‘quela salopèria retenguet nonmàs « fòla dins sos arias, comunautariste ‘donc un dangier ».

  • Coma eu parla daus gais que ‘visan l’Orient-mejan tras Israel, veiquí un liam (→òc-lm) per me far batre.
  • Coma parle maitot de la Julia Maroch, veiquí un liam (→òc-lm) per la vos tornar far coneitre.
  • E per ‘chabar, mon bilheton (→òc-lm)  sus ‘na granda tapeta de gaucha, un comuniste mesma.