Lo Prinçonet – Revirada dau Paul Rainal

I tòrne ‘na vetz de mai.

Apres l’aver comandar (>òc), lu reçauguí e, ‘pres lu ‘ver reçaugut, me faguet be lu legir ‘queu libre.

D’en prumier, e v-òc-es, es important, lu libre es fòrça be realisat, de bona factura coma iò disen los francilhons. Emai i aguesse quauquas errors, certanament dins la transcripci’, per eisemple, paja 16, lu meschaent « espifodada » e tres linhas apres lu bon « espofidada », totjorn dins ‘quela paja, un « respôndiguet » la ficha mau, e entau ad autras pajas, pauc de pajinas aürosadament. Coma sei un pauc justa dins mas letras, aquò será la sola critica dau Jan la critica que setz apres legir lu cibercaier.

« Si o platz… dessenha me ‘n’auvelha… »

La formula magica per me far virar goiasson, dietz ans d’atge, lu nas picat dins un libre daus bons. La revirada es ‘na miraudia, m’eriá jurat de jamai chaptat de revirada dau « Petit Prince ». L’istòria es mai que mai coneguda, ‘laidonc me pensava que ‘quò eriá un pauc colhonar las chausas.

E be non. Non, non, non, la magia es restada entiera. La linga dau Rainal es jurta au bon niveu. N’i a pas de sabantarias coma iò cranhava.

Afè, ‘na legida entau per los temps d’aüei es d’un benaise prigond. Pensatz a tots ‘quilhs politics, ‘quilhs economistes, ‘quilhs jornalistes mai los tecnocrates e sens obludar que tot aquò se conjuga au feminin maitot, mai ralament mas maitot, ‘quilhs gents que totas la jornada fan de las expertisas sabantas per nos far bolar dins ‘na gaulha merdosa, qua’iement tots degueten lu legir.

Es beleu aquí que se tròba la limita d’una tala faula ente un goiat encontra un òme d’afar, un rei, un geografe… totas semblanças coma lu monde moderne es la resulta dau asard. Aquò resta ‘na fabla, resmai.

Sei un pauc einuscent de pensar d’un tau libra qu’eu poriá chamjar la mòda dau monde, pensatz, l’i auriá be pro de gent per l’esbocinat.

Afè, que ‘quela nòta negativa vos fai pas passar l’envèia de lu legir, ne’n lemosin de segur o dins la linga que vos platz.

  • Per los e las de Nissa :

Lou Pichin Prince. Antoine de Saint-Exupéry, revirat per Albert Rosso.

« … Ma lou reinart revenguèt à la sieu idea : la mieu vida es mounoutouna. Cassi li galina, lu ome mi casson. Touti li galina si semblon, e touilu ome si semblon. M’ennuèii un pau. Ma, se m’asoumestegues, la mieu vida serà couma ensouleida… ».

[14,50 x 20,50 – 100 pajinòtas, eiditat chas P.Negre (2002), 16€95]

  • Per las gasconas coma per los gascons :

Lo Princòt. Saint-Exupéry.

[21 x 21 – 90 pajas, brochat, estampat per Princi Negre (1995), 14€48]

  • Per los provençaus, las provençalas :

Crese saber que la Majorala Peireta Berengier es après ne’n far ‘na revirada.

  • Per los lemosins mai las lemosinas :

Lo Prinçonet.  Antoine de Saint-Exupéry

Escòla ‘Chabatz d’Entrar – CCP Association Escòla ‘Chabatz d’Entrar

8, chemin des Bruyères – 69130 Ecully.

[15€00 mai 4€00 per lu portatge]

  • E fin finalament, per los o las occitanistes e los o las linguïstes :

Lo Princilhon. Antoine de Saint Exupéry. Amb d’aquarellas de l’autor. Revirat en lengadocian per Jòrdi Blanc.

« Una estranha votz pichonèla me desrevelhèt. Me fasiá : « Se vos plai… dessenha-me un moton ! » Me quilhèri coma folzejat pel tròn. Me freguèri plan los uèlhs. Regassèri. E te vegèri un omenet, quicòm d’extraordinari, que m’espiava grèvament. »

[16,50 x 23 – 96 pajinas, brocat, imprimit ençò de Vent Terral (1994), 13€50]

Sauv mas natretats, podetz los ‘chaptar, per eisemple, vòle pas vos forçar la man, chas :

ESPACI OCCITAN, 21, charriera de l’Estampariá – 05000 GAP – France / Occitània. Tel / Fax / Resp : 04 92 53 98 40

http://www.espaci-occitan.com

Per veire ‘n’amassada de cubertas podetz picar aquí o pichar ‘quí coma v’autres voletz, es lu liam d’ente ven l’eimatge.

Publicités