Finlandanihon

V-òc-es, i sem, un barbargonejadís° de mai sus l’afar Mela©, boirat mai un pauc de nonitatisme¹ lemosinat. E be non.

D’en prumier, sei benaürós que son afar siàia tornat quilhat d’aplomb (→òc). Coma sei enta² mas pas sens creienças, sacrifiguí mon pece aus noveus dius que son Google© mai Blogger© , disí non a mon torna-mononeda, de las vetz qu’una de las fadas « chapduelhesquèsas » prenguesse lu temps de desbrochar las miserias « melaesquèsas », me prenguí mesma a prejar Sent Marçau, Sent Ròch, Sent Cosme e Sent Martin per qu’ilhs la tiressen d’aquela marda virtuala.

Afè, es ‘chabat aura, l’i a be ‘gut un quauquaren que marchet.

Non, un bilhet per dire que lu temps qu’es pas passat en un cibercaier l’es alhors, non pas sus daus sitís « ics » que lu « x » eisista gaire ne’n lemosin, non, daus « d’òc ».
Fautet ‘nar per eisemple sus lu sití de l’Òmi (→òc) per veire que eu legís daus libres dau TANIZAKI Junichirô, coma sei après lu far ad-aqueu temps de davalada (‘tencion, TANIZAKI es son nom de familha). L’Òmi legís pas los mesma, aürosadament, entau, escrivem pas los mesma bilhets. Trobí dins « la laus dau reirlutz » d’eimatges mai-que-mai pròpches de l’escurita de las meijons lemosinas. Me fau legir aura « la margauda, son mestre e sas doas mestressas ». Descubrissí lu TANIZAKI per far lu chamja daus MISHIMA, KAWABATA o daus MURAKAMI, Ryû mai Haruki, o enquera las « haïjins », las poëtessas japonesas que farjan daus « haïku » tant gentes.

 Tanizaki JunichiroTANIZAKI Junichirô, tirat dau blòg Mollat (→fr)

Autre eisemple de cultura « mainstream » o b’etot de « Melainstream » perquè parlem ‘quí de la nòstra eroina. Bon, a 40 ans estre d’òc e fanatisat per « la guerra de las estialas » es gran originau, laidonc fasetz un pitit trabalh e charchatz sus son blòg (→òc) « Arto PAASILINNA » trobaretz son bilhet sus un libre geniau, ‘na legida d’estiu se me trompe pas. Per segre la mòda, far coma tot lu monde, debutetz per « la lebra dau Vatanen ».

Es luquau qu’escriguet lu libre que me permetet de restar sòu dau temps dau festivau gai de filmes teleramardesques. V-òc-es n’i a daus profs despressius que ne’n mai de babinhar venan far chiar dins la rua per votar per los primates de la gleisa sociatelista, au merchat per far signar lurs reclamadís, au cinema per purar sus lu asard³ que los faguet eissir gais sens degun a aimar. Afè, entau fasent, fase* una apartat que t’i pausse lu barradon còp-sec. ‘Queu libre, un anti Monsur-Mamadòu-que-fai-tornar-meijon-ta-femna-mai-la-Pomponneta es « pichons suicidís dintra amics ». ‘Na meravilhosa miraudia per aver la patz, ad-un punt tau que ‘chaptí « lu servidor bestiau dau Pastor Huuskonen ».

Tot aquò per dire que sabe pas se l’i a ‘na cultura « occitana », me songe personaladament** que non. Fòra la gent de la carta limerò 72 (→fr) de chas Michelin© d’aicijurtà la mar granda dins un sens e lu torilhon rotier « Vichy-Moulins » dins l’autre, ai p’una simpatia per los « occitans ».

L’eimatge ven d’aquí (→fr)

Per lu restant, beleu ‘na fòrma de cultura « mainstream » de la Finlanda au Japon.

Queu-quí o quela-quí que balha la referença culturala conhada dins lu titre titolisador dau bilhet ganha mon estima per la vita.

Nòtas :
° lu mòt eisista pas
¹ es pas de me
² dins lu Tintou = ateu
³ la « z » maitot devriá pas estre usada, nonmàs per las conjugasons.
*  entau fasent fase, fase, fase, segur mas : « ieu fau quò que vòle mai mos piaus » Liliana B.
** embonilhescament~adament se v’autres aimatz mielhs, o a deman, tot cort, mas ‘quò vòu pas dire parrier.

Publicités

Une réflexion sur “Finlandanihon

  1. Òme de la Stacion 25/10/2011 / 09:27

    Avem pas legit los mesme pr’amor qu’èi pas enqüèra tot legit ! Paciénça ! Ensaji d’espaçar las lecturas dab d’autes libes (japonés, anglés, francés o quitament occitan) per pas n’en har una indigestion…

    J'aime

Les commentaires sont fermés.